දකුණු කොරියාවේ රැකියා සඳහා මත්තලින් පිරිසක් පිටත් වෙයි

කොරෝනා වයිරස තත්වය හේතුවෙන් තාවකාලිකව නවතා දමා තිබුණු  විදේශ රැකියා සඳහා පිටත්ව යාම නැවත ආරම්භ කරමින් ප්‍රථම ගුවන් යානය මගීන් 160 දෙනෙකු රැගෙන මත්තල  ගුවන්තොටුපොළේ සිට දකුණු කොරියාවේ සෝල් නුවර බලා අද (27) උදෑසන පිටත්ව ගිය බව මත්තල ගුවන්තොටුපොළ ප්‍රධාන කළමණාකරු උපුල් කළංසුරිය මහතා පැවසීය.

මියන්මාර් ගුවන් සේවයට අයත් MAI 8M801 වර්ගයේ ගුවන් යානයකින් මෙම පිරිස පිටත්ව ගිය බව ගුවන්තොටුපොළ ප්‍රධාන කළමණාකරු සඳහන් කළේය.

මෙම පිරිස දකුණු කොරියාවේ රැකියාවල නිරතව සිට නිවාඩුවක් සඳහා මෙරටට පැමිණ සිටි පිරිසක් බවත් මොවුන් සියළුම දෙනා මාර්තු 10 වෙනි දිනට පෙර මෙරටට පැමිණි පිරිසක් බවත් විදේශ සේවා නියුක්ති කාර්යංශයේ කළමනාකරු කල්‍යානප්‍රිය රාමනායක මහතා පැවසීය.

ශ්‍රි ලංකා විදේශ සේවා නියුක්ති කාර්යංශයේ මගපෙන්වීම යටතේ කොරියාවේ සංචාරක ආයතනයක් හා මෙරට සංචාරක ආයතනයක් එක්ව මියන්මාර් ගුවන් යානය මෙම ගුවන් ගමන සඳහා එක්කරගැනීමට අවශ්‍ය කටයුතු සිදු කර තිබුණි.

මෙම රැකිලාභීන් සියළු දෙනා කොරියාවට ගිය පසු එහිදීද දින 14 ක නිරෝධායනයකට ලක් විය යුතු බව ශ්‍රී ලංකා කොරියානු මානව සම්පත් සංවර්ධන ආයතනයේ නේවාසික අධ්‍යක්ෂ කිම් වොන් සොක් මහතා පැවසීය.

මෙම මගීන් පිරිස (26) වැනිදා රාත්‍රී 8.30 වන විට මත්තල ගුවන්තොටුපොළට පැමිණ සිටියහ.

මේ අවස්ථාව සඳහා විදේශ සේවා නියුක්ති කාර්යංශයේ සභාපති කමල් රත්වත්තේ,කොරියානු මානව සම්පත් සංවර්ධන ආයතනයේ නේවාසික අධ්‍යක්ෂ කිම් වොන් සොක්,විදේශ සේවා නියුක්ති කාර්යංශයේ නියෝජ්‍ය සාමාන්‍යාධිකාරී මංගල රන්දෙණිය,ගුවන්තොටුපොළ හා ගුවන් සේවා සමාගමේ අධ්‍යක්ෂ ෂෙහාන් සුමනසේකර ඇතුළු පිරිසක් එක්ව සිටියහ.

Print Friendly, PDF & Email

ඔබේ අදහස් එකතු කරන්න

ස්වයංක්‍රීය සිංහල ටය්පින් මෘදුකාංගය සහිතයි. ඔබේ වචන සිංග්ලිෂ් වලින් ටයිප් කර ස්පේස් බාර් එක එබීමෙන් ස්‌වයංක්‍රීයව සිංහල වචන වලට හැරවේ.

මෙම වෙබ් අඩවිය ශ්‍රමය පිළිබද අධ්‍යාපනය, දැනුම හා අන්‍යොන්‍ය සංවාදය සදහා පමණක් වෙන් වුවකි.

Wedabima.lk © 2014 | Contact - wedabima@yahoo.com - +94 777 073 435