බලෙන් කෝවිඩ් පඩි කැපිල්ල නැගෙනහිරින් ඇරඹේ

කෝවිඩ් 19 වසංගතයට මුහුණ දීම සඳහා යයි පවසමින් රාජ්‍ය සේවකයන්ගේ වැටුප් බලහත්කාරයෙන් කැපීම නැගෙනහිර පළාතෙන් ආරම්භ කර තිබේ.

සෞඛ්‍ය හා සමාජ ආරක්ෂණ අරමුදල සදහා නැගෙනහිර පළාත් පාසල්වල ගුරුවරුන්ගේ සහ විදුහල්පතිවරුන්ගේ මැයි මස වැටුපෙන් දිනක වැටුප ඔවුන්ගේ කැමැත්තකින් තොරව කෝවිඞ් 19 අරමුදලට පරිත්‍යාග ලෙස අයකරගෙන ඇති බව පවසන දිවයිනේ ප්‍රමුඛතම ගුරු සංගම් එකමුතුවක් අවධාරණය කරන්නේ එයට එරෙහිව අධිකරණ ක්‍රියාමාර්ග ගන්නා බවයි.

ගුරු-විදුහල්පති වෘත්තීය සමිති එකතුවේ කැදවුම්කරු ජෝසප් ස්ටාලින් විසින් නිකුත් කර ඇති නිවේදනයක දැක්වෙන පරිදි 20 බදාදා දින මැයි මස වැටුප් ලැබූ නැගෙනහිර පළාත් පාසල්වල ගුරුවරුන්ගේ හා විදුහල්පතිවරුනගේ වැටුපෙන් දිනක වැටුප කැමැත්තකින් තොරව බලහත්කාරී ලෙස කපා තිබේ.

එම ක්‍රියාව ගුරුවරුන්ගේ සහ විදුහල්පතිවරුන්ගේ වැටුප සම්බන්ධයෙන් සිදුකරන ලද බලහත්කාරී මෙන්ම අනීතික ක්‍රියාවක් ලෙස ගුරු සංගම් නායකයා හෙළා දැක ඇත.

“නැගෙනහිර පළාත් ආණ්ඩුකාරවරිය හා නැගෙනහිර පළාත් ලේකම්වරු අතර පැවති සාකච්ඡාවකදී නැගෙනහිර පළාත් රාජ්‍ය සේවකයන්ගේ දිනක වැටුප පරිත්‍යාග කිරීමට එකඟ වූ බවත්, ඒ අනුව සියලූම සේවකයන්ගේ දිනක වැටුප අය කරන ලෙසත් සඳහන් කරමින් නැගෙනහිර පළාත් ප‍්‍රධාන ලේකම්ගේ අත්සනින් යුතුව මාර්තු 31 දිනැතිව ලිපියක් යොමු කර තිබුණි. එම ලිපියට අනුව නැගෙනහිර පළාත් පාසල්වල ගුරුවරුන්ගේ හා විදුහල්පතිවරුන්ගේ දිනක වැටුප කැමැත්ත විමසීමකින් තොරව බලහත්කාරි  ලෙස කපා නොගන්නා ලෙස ගුරු-විදුහල්පති සංගම් විසින් නැගෙනහිර පළාත් ආණ්ඩුකාරවරියගෙන් ඉල්ලා සිටින ලදී.”

මේ ආකාරයට බලහත්කාරී ලෙස දිනක වැටුප් කැපීම පූර්වාදර්ශ කරගනිමින් ජනාධිපති ලේකම් පී.බී. ජයසුන්දරගේ ඉල්ලීම අනුව මසක හෝ මාස බාගයක වැටුප් කැපීමට ඉදිරියේදී පෙළඹෙනු ඇතැයි  ගුරු-විදුහල්පතිවරු බිය පළ කරන බව ගුරු සංගම් නායකයා නිකුත් කළ නිවේදනයේ දැක්වේ.

“1985 ප්‍රේමලාල් පෙරේරාට එරෙහිව වීරසූරිය නඩු තීන්දුවේ පැහැදිලිව දක්වා ඇත්තේ රාජ්‍ය සේවකයන්ගේ මුදල් කැමැත්තකින් තොරව කැපිය නොහැකි බවයි. එසේම ආයතන සංග‍්‍රහය හා මුදල් රෙගුලාසි විධිවිධාන අනුව ද රාජ්‍ය සේවකයන්ගේ වැටුප් කැමැත්තෙන් තොරව කැපිය නොහැකිය,” යි එම නිවේදනය රජයට සිහිපත් කර දේ.

ආයතනිකව හා පෞද්ගලිකව ලැබෙන  පරිත්‍යාග රැස්කොට මේජර් ජනරාල් කේ. බී එගොඩවෙලගේ නායකත්වයෙන් පවත්වාගෙන යන  COVID 19 සෞඛ්‍ය හා සමාජ ආරක්ෂණ අරමුදලේ ශේෂය  මැයි 20  වන විට රුපියල් මිලියන 1128  ඉක්මවා ගිය බව ජනාධිපතිවරයා විසින් නිවේදනය කර තිබේ.

වසංගතයට මුහුණ දීම සඳහා පවත්වාගෙන යන අරමුදල් වලට දායක වීමෙන් රජයේ ආරක්ෂක අංශ නිදහස් කර තිබේ.

වැඩබිම

Print Friendly, PDF & Email

ඔබේ අදහස් එකතු කරන්න

ස්වයංක්‍රීය සිංහල ටය්පින් මෘදුකාංගය සහිතයි. ඔබේ වචන සිංග්ලිෂ් වලින් ටයිප් කර ස්පේස් බාර් එක එබීමෙන් ස්‌වයංක්‍රීයව සිංහල වචන වලට හැරවේ.

මෙම වෙබ් අඩවිය ශ්‍රමය පිළිබද අධ්‍යාපනය, දැනුම හා අන්‍යොන්‍ය සංවාදය සදහා පමණක් වෙන් වුවකි.

Wedabima.lk © 2014 | Contact - wedabima@yahoo.com - +94 777 073 435