මැදපෙරදිග සේවය කළ ශ්‍රී ලාංකිකයින් 35ක් කොවිඩ්වලට බිලි වෙලා

Covid-19 ආසාදනය වීම හේතුවෙන් මේ වන විට මැදපෙර කලාපයේ රටවල සේවය කළ ශ්‍රී ලාංකිකයින් 35 දෙනකු මිය ගොස් ඇති බවත් පසුගිය සති තුනක කාලය තුළ පමණක් ශ්‍රී ලාංකිකයින් 15 දෙනකු කොවිඩ්-19 ආසාදනයෙන් මිය ගිය බවත් තානාපති කාර්යාල ආරංචි මාර්ග සදහන් කරයි.

මේ අනුව සෞදි අරාබිය, එක්සත් අරාබි එමීර්, ක්වේට්, කටාර්, ඕමාන් සහ ලෙබනන් යන රටවල සේවය කළ පිරිමින් 33 දෙනකු සහ කාන්තාවන් දෙදෙනකු මිය ගොස් ඇත.

මේ සම්බන්ධයෙන් ජනමාධ්‍ය වෙත ප්‍රකාශයක් කළ විදේශ අමාත්‍යාංශ ප්‍රකාශකයෙකු සදහන් කර ඇත්තේ ජාත්‍යන්තර නීතියට අනුව අදාළ පුද්ගලයින්ගේ ආදාහන කටයුතු ඔවුන් සේවය කළ රටවලදී සිදු කළ බවයි.

කොවිඩ්-19 ආසාදනය හේතුවෙන් සිදුවූ මෙම මරණ ගැන ප්‍රකාශයක් කළ තානාපති කාර්යාල උසස් නිලධාරියෙකු සදහන් කළේ මැදපෙරදිග කලාපයේ කොවිඩ්-19 වසංගත අවදානම ඉහළ යත්ම එම කලාපයේ සේවය කළ 40,000කට අධික පිරිසක් ලංකාවට ඒමට සූදානමින් පසු වූ බවයි. එහෙත් ලංකාවේ නිරෝධාන පහසුකම් ප්‍රමාණවත් නොවීම හේතුවෙන් ඔවුන් මෙරටට ගෙන්වා ගැනීම දිගින් දිගටම ප්‍රමාද වූ බව ද ඔහු සදහන් කළේය.

මේ අතර ජෝන්ස් හොප්කින්ස් විශ්වවිද්‍යාලයේ කොරෝනා සම්පත් මධ්‍යස්ථානයේ නිල වෙබ් අඩවියේ අද (9) දින පස්වරු 10.00ට සිදුකළ නවතම යාවත්කාලී කිරීම්වල සදහන් වන්නේ මැදපෙරදිග කලාපයේ කොවිඩ්-19 අවදානම අඛණ්ඩව ඉහළ යන බවයි.

ඒ අනුව අද දිනය වන විට සෞදි අරාබියෙන් ආසාදිතයින් 223,327ක්, කටාර් හි ආසාදිතයින් 102,110ක්, එක්සත් අරාබි එමීර්හි ආසාදිතයින් 53,577ක්, කුවේට්හි ආසාදිතයින් 52,840ක් සහ මරණ 382ක්, ඕමානයෙන් ආසාදිතයින් 51,725ක් සහ බහරේන් හි ආසාදිතයින් 30,931ක් වාර්තා වී ඇත.

Print Friendly, PDF & Email

ඔබේ අදහස් එකතු කරන්න

ස්වයංක්‍රීය සිංහල ටය්පින් මෘදුකාංගය සහිතයි. ඔබේ වචන සිංග්ලිෂ් වලින් ටයිප් කර ස්පේස් බාර් එක එබීමෙන් ස්‌වයංක්‍රීයව සිංහල වචන වලට හැරවේ.

මෙම වෙබ් අඩවිය ශ්‍රමය පිළිබද අධ්‍යාපනය, දැනුම හා අන්‍යොන්‍ය සංවාදය සදහා පමණක් වෙන් වුවකි.

Wedabima.lk © 2014 | Contact - wedabima@yahoo.com - +94 777 073 435