පකිස්තාන අගමැති ඉම්රාන් ඛාන් විශ්වාසභංගයෙන් පරාජය වීමත් සමඟ බලයෙන් පහකර තිබේ.
දින කිහිපයක් නාටකාකාර ලෙස විපක්ෂ ඔහුට එරෙහිව විශ්වාසභංග යෝජනාවක් ගෙන ඒමෙන් පසු (අප්‍රේල් 09) මධ්‍යම රාත්‍රියෙන් පසු ඡන්ද විමසීම පැවැත්විණි.
පසුගිය සතියේ ඉම්රාන් ඛාන්ට එරෙහිව මෙම යෝජනාව මුලින්ම ගෙන ආ නමුත් ඔහු පාර්ලිමේන්තුව විසුරුවා හැරීමෙන් එය අවහිර කළේය.
ඉරිදා ඡන්දය පැවැත්වුණේ රටේ ශ්‍රේෂ්ඨාධිකරණය විරුද්ධ පක්ෂවලට පක්ෂව තීන්දුවක් දීමෙන් පසුව සහ ඉම්රාන් ඛාන් ව්‍යවස්ථා විරෝධී ලෙස ක්‍රියා කර ඇති බව පැවසීමෙන් පසුවය.
ඉම්රාන් ඛාන් විශ්වාසභංගයකින් බලයෙන් පහකළ පළමු පකිස්තාන අගමැති වේ.
පකිස්තාන පාර්ලිමේන්තුව සඳුදා රැස්වන්නේ එරට නව නායකයා තෝරාගැනීම සඳහායි.
එම පුද්ගලයාට මීළඟ මැතිවරණය පැවැත්වීමට නියමිත 2023 ඔක්තෝබර් දක්වා බලයේ සිටීමට හැකි වනු ඇත.
ආණ්ඩු පක්ෂ සාමාජිකයින් හෝ නම් කරන ලද කතානායකවරයෙකු නොමැති අතර ජාතික සභාව භාරව සිටින අයාස් සාදික් පැවසුවේ අපේක්ෂකයින් සඳහා නාමයෝජනා පත්‍ර එරට වේලාවෙන් ඉරිදා 11:00 (GMT 06:00) වන විට ගොනු කළ යුතු බවයි.
මන්ත්‍රී ආසාන 342 කින් යුත් මන්ත්‍රී මණ්ඩලයේ විශ්වාසභංගයට පක්ෂව ඡන්ද 174 ක් ලබා ගැනීමට විරුද්ධ පක්ෂවලට හැකි වූ බව කථානායකවරයා පැවසුවේ, එය බහුතර ඡන්දයක් බවට ප්‍රකාශයට පත් කරමිනි.
ට්විටර් පණිවුඩයක් නිකුත් කරමින් විපක්ෂ නායක ෂෙහ්බාස් ෂරීෆ් කියා සිටියේ පාකිස්තානය සහ එහි පාර්ලිමේන්තුව "අවසානයේ බරපතල අර්බුදයකින් නිදහස් වූ" බවයි.
ෂරීෆ් තවදුරටත් මෙසේ පැවසීය: "නව උදාවකට පාකිස්තාන ජාතියට සුබ පැතුම්."
'ජාත්‍යන්තර කුමන්ත්‍රණයක්'
විපක්ෂ ආණ්ඩුවක් තමන් පිළිනොගන්නා බව ඉම්රාන් ඛාන් පැවසීය. රුසියාවට සහ චීනයට එරෙහි ප්‍රශ්නවලදී වොෂින්ටනය සමඟ පෙනී සිටීම ප්‍රතික්ෂේප කිරීම නිසා ඔහුව ඉවත් කිරීමට එක්සත් ජනපදය ප්‍රමුඛ කුමන්ත්‍රණයක් ඇති බව - සාක්ෂි නොමැතිව - ප්‍රකාශ කරමින් ඔහු කියා සිටියේය.
පාකිස්තානයේ විරුද්ධ පක්ෂ, විදේශ බලවතුන් සමඟ කටයුතු කරන බව ඔහු පුන පුනා කියා ඇත.
මෙම චෝදනාවල "කිසිදු සත්‍යයක්" නොමැති බව එක්සත් ජනපදය පවසා ඇති අතර ඉම්රාන් ඛාන් කිසිවිටෙක කිසිදු සාක්ෂියක් ඉදිරිපත් කර නැත.
| පාකිස්ථානයේ ඉස්ලාමාබාද් නුවර පැවති විරෝධතාවයක් අතරතුර හිටපු පකිස්ථාන අගමැති ඉම්රාන් ඛාන්ගේ ආධාරකරුවන් පොලිස් නිලධාරීන් විසින් අත්අඩංගුවට ගෙන තිබේ
රුසියාව යුක්රේනය ආක්‍රමණය දියත් කරමින් සිටියදී ජනාධිපති ව්ලැඩිමීර් පුටින් හමුවීමට ඔහු මොස්කව් වෙත ගිය අතර බුෂ් පරිපාලනය ත්‍රස්තවාදයට එරෙහි යුද්ධය ලෙස හැඳින්වූ එය ඔහු කලින් විවේචනය කළේය.
ඡන්දය ආරම්භ වීමට මිනිත්තු කිහිපයකට පෙර, ඛාන්ගේ හිතවතෙකු වන පාකිස්තානයේ පහළ මන්ත්‍රී මණ්ඩලයේ කථානායකවරයා සිය ඉල්ලා අස්වීම නිවේදනය කළේය. ඛාන්ගේ පක්ෂයේ (PTI) සාමාජිකයන් ඔහු ජාත්‍යන්තර කුමන්ත්‍රණයක ගොදුරක් බව අවධාරනය කරමින් ගොඩනැගිල්ලෙන් පිටව ගියහ.
අනුග්‍රහය ගිළිහිම
පාකිස්තානයේ ජාතික ක්‍රිකට් කණ්ඩායමේ හිටපු නායකයා 2018 දී අගමැති ලෙස තේරී පත් වූ අතර දූෂණයට එරෙහිව සටන් කිරීමට සහ ආර්ථිකය නිවැරදි කිරීමට පොරොන්දු විය.
එහෙත් එම පොරොන්දු ඉටු නොවූ අතර රට මූල්‍ය අර්බුදයකට හසුව තිබේ.
මාර්තු අග භාගයේ දී ආණ්ඩුවේ මන්ත්‍රීවරුන් රැසක් ඉවත්ව යාම හමුවේ ඔහුට ඔහුගේ බහුතරය අහිමි වූ අතර ඔහුගේ දේශපාලන ජීවිතය සඳහා සටන් කිරීමට සිදුවිය.
BBC හි සිකුන්දර් කර්මානි පවසන්නේ ඉම්රාන් ඛාන් පාකිස්තාන හමුදාවේ සහාය ඇතිව බලයට පැමිණි අයෙකු ලෙස පුළුල් ලෙස සලකනු ලබන නමුත් දැන් නිරීක්ෂකයින් පවසන්නේ ඔවුන් බිඳ වැටී ඇති බවයි.
පී.ටී.අයි සෙනෙට් සභික ෆයිසාල් ජාවෙඩ් ඛාන් කියා සිටියේ ඉම්රාන් ඛාන් සිය අගමැති නිවසින් පිටව ගියේ "හොඳින් නමුත් ඔහු හිස නැමුවේ නැත" යනුවෙනි.
සෙනෙට් සභිකයා තවදුරටත් කියා සිටියේ හිටපු අගමැතිවරයා "මුළු ජාතියම ඔසවා තැබූ" බවයි.
පසුගිය සති අන්තයේ මොකද වුණේ?
විශ්වාසභංග ඡන්ද විමසීම පසුගිය සතියේ පාර්ලිමේන්තුවේදී පැවැත්වීමට නියමිතව තිබූ නමුත්,ඉම්රාන් ඛාන්ගේ දේශපාලන පක්ෂයේ සාමාජිකයෙකු වන නියෝජ්‍ය කථානායක කාසිම් සූරි, "විදේශ මැදිහත්වීමක්" පෙන්නුම් කරන බව පවසමින් යෝජනාව කඩිනමින් අවහිර කළේය. එය රාජ්‍යයට පක්ෂපාතීත්වය ඉල්ලා සිටින ව්‍යවස්ථාවට පටහැනි බව ද සූරි මහතා පැවසීය.
ඛාන්ගේ රජය පාර්ලිමේන්තුව විසුරුවා හැරීමට ගොස් හදිසි මැතිවරණයක් පවත්වන ලෙස ඉල්ලා සිටියේය. මෙය විපක්ෂයේ මන්ත්‍රීවරුන් කිහිප දෙනෙකු කෝපයට පත් කළ අතර සමහරු ඡන්දය ප්‍රකාශ කිරීම අවහිර කිරීම සම්බන්ධයෙන් අගමැතිට ද්‍රෝහී යැයි චෝදනා කළහ.
තත්ත්වය තක්සේරු කිරීම සඳහා විපක්ෂ දේශපාලනඥයින් ශ්‍රේෂ්ඨාධිකරණයට පෙත්සමක් ඉදිරිපත් කළේය.
බ්‍රහස්පතින්දා පකිස්තාන ශ්‍රේෂ්ඨාධිකරනය විසින් තීන්දුව ප්‍රකාශයට පත් කරනු ලැබුවේ ඉම්රාන් ඛාන් ඡන්දය ප්‍රකාශ කිරීම නැවැත්වීමට ගත් තීරණය ව්‍යවස්ථා විරෝධී බවයි. විශ්වාසභංගය නැවත පැවැත්විය යුතු බවට ද එරට ශ්‍රේෂ්ඨාධිකරණය නියෝග කළේය.
කෙසේ වෙතත්, ඡන්දය පිළිබඳ අවුල්සහගත තත්වයක් සෙනසුරාදා සවස් වන තුරුම දිගටම පැවති අතර, පාර්ලිමේන්තුවේ පහළ මන්ත්‍රී මණ්ඩලය කතානායක - ඉම්රාන් ඛාන්ගේ හිතවතෙකු වන අසාද් කයිසර් ඉල්ලා අස්වීමට පොළඹවන ලදී.
(bbc/sandeshya)
