- පාස්පෝට් 275 ක් විමර්ශන නිළධාරීන් භාරයට...
ශ්‍රි ලංකා විදේශ සේවා නියුක්ති කාර්යාංශයේ අනුමත වලංගු රැකියා අනුමැතියකින් තොරව දකුණු කොරියාවේ රැකියා ලබාදෙන බව පවසා මුදල් අයකර, අයදුම්පත් රැස්කර සම්මුඛ පරීක්ෂණ පැවැත්වූ පේරාදෙණිය Upcountry Manpower ආයතනයේ හිමිකරු කාර්යාංශයේ විශේෂ විමර්ශන අංශයේ නිළධාරීන් විසින් 2023.06.10 දින අත්අඩංගුවට ගෙන තිබේ.
පේරාදෙණිය, ගැටඹේ, දංගොල්ල පාර, ශ්‍රි අමරවංශ මාවත යන ස්ථානයේ දකුණු කොරියාවේ රැකියා සඳහා බඳවාගැනීම් සිදුකිරීමට සම්මුඛ පරීක්ෂණ පැවැත්වෙන බවට විදේශ සේවා නියුක්ති කාර්යාංශයේ විශේෂ විමර්ශන අංශයේ නිළධාරීන්ට ලද තොරතුරක් මත අදාල ස්ථානය වැටලීම් කරන ලදී.
වැටලීම සිදුකරන අවස්ථාවේදී දකුණු කොරියානු රැකියා ලබාගැනීම වෙනුවෙන් වූ සම්මුඛ පරීක්ෂණ සඳහා විශාල පිරිසක් අදාළ ස්ථානයට පැමිණ තිබුණු අතර, එහිදී මෙම ජාවාරම මෙහෙයවූ ප්‍රධාන සැකකරු අත්අඩංගුවට ගෙන තිබේ.
අදාළ ස්ථානයේ තිබී දකුණු කොරියාවේ රැකියා ලබාදීමට පුද්ගලයින්ගෙන් රැස්කළ විදේශ ගමන් බලපත්‍ර 275, රැකියා අයදුම්පත් හා පොලිස් වාර්තා ඇතුළත් ලිපිගොනු 615, විදේශ ගමන් බලපත්‍ර භාරගැනීමේ ලේඛනයක්, කොරියානු භාෂාවෙන් සඳහන් අයදුම්පත් ඇති ලිපිගොනු, කොරියාවේ රැකියා ඇබෑර්තු ඇති බව සඳහන් බැනරයක් ඇතුළු ලේඛන රැසක් විමර්ශන නිළධාරීන් භාරයට ගන්නා ලදී.
සැකකරු, කාර්යාංශයේ අනුමත වලංගු රැකියා ඇණවුමකින් තොරව රැකියා සඳහා පුද්ගලයින් බඳවාගැනීම සඳහා සම්මුඛ පරීක්ෂණ පැවැත්වීමේ චෝදනාව මත 2023.06.11 දින මහනුවර මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව රුපියල් ලක්ෂය බැගින් වූ ශරීර ඇප 2ක් මත මුදාහැරීමටත්, වැඩිදුර නඩු විභාගය 2023.09.01 දින යළි කැඳවීමටත් මහේස්ත්‍රාත්වරයා නියෝග කළේය.
රැකියා අපේක්ෂිතයින් 3000ක පමණ පිරිසක් මෙම වංචාවට හසුව ඇති බවට විමර්ශන නිළධාරීන් වෙත තොරතුරු ලැබී ඇති අතර, ඒ පිළිබඳව වැඩිදුර විමර්ශන කාර්යාංශය විසින් මෙහෙයවනු ලබයි.
මෙම අත්අඩංගුවට ගැනීම සඳහා කාර්යාංශයේ විමර්ශන අංශයේ කළමනාකරු කපිල කරුණාරත්න හා විමර්ශන නිළධාරීන් වන සරත් විමලවීර, වසන්ත ඒකනායක, මදුෂාන් විජේවර්ධන, නදීකා චන්ද්‍රමාලි හා ගයේෂා සුභාෂිණි යන නිළධාරීන් එක්විය.
විදේශ රැකියාවක් ලබාගැනීම සඳහා යම් ආයතනයකට හෝ පුද්ගලයෙකුට මුදල් ලබාදීමට පෙර එම ආයතනයට විදේශ රැකියා සඳහා බදවාගැනීමට කාර්යාංශයේ වලංගු බලපත්‍රයක් තිබේද යන්න හා වලංගු රැකියා නියෝජිතායතනයක් වුවද එම ආයතනයට අදාළ රැකියා ඇණවුම ලැබී ඇත්දැයි යන්න සොයා බැලීම සඳහා කාර්යාංශයේ www.slbfe.lk වෙබ් අඩවියට පිවිසීමෙන් හෝ 1989 ක්ෂණික ඇමතුම් අංකය ඇමතීම මගින් තොරතුරු ලබාගන්නා ලෙස කාර්යාංශය රැකියා අපේක්ෂිතයින්ගෙන් ඉල්ලා සිටියි.
වලංගු අනුමැතියකින් තොරව විදේශ රැකියා ලබාදෙන බවට මුදල් අයකරන පුද්ගලයින් හෝ ආයතන පිළිබඳව තොරතුරු දන්නේ නම් කාර්යාංශයේ ක්ෂණික ඇමතුම් අංකය වන 1989 ඇමතීම මගින් හෝ කාර්යාංශයේ විශේෂ විමර්ශන අංශයේ දුරකථන අංකය වන 0112864241 අංකය ඇමතීම මගින් කාර්යාංශය වෙත දැනුම් දෙන මෙන් මහජනතාව දැනුවත් කරන්නේ නම් මැනවි.
