ජනමාධ්‍ය මගින් පසුගිය දිනවල වැඩිවශයෙන් කතාබහට ලක් වූ ඕමානයේ ශ්‍රී ලංකා තානාපති කාර්යාලය යටතේ පවතින සේවිකා සුරක්ෂා නේවාසිකාගාරයේ රැඳී සිටි කාන්තාවන් මුහුණ පා ඇති ගැටළු සහගත තත්ත්වය නිරාකරණය කරමින් ශ්‍රී ලාංකිකයින් වශයෙන් ඔවුන් නැවත මෙරටට ගෙන්වීමේ කටයුතු කාර්යාංශය විසින් ආරම්භ කර ඇත. ඒ අනුව 2022.12.24 දින පළමු කණ්ඩායම වශයෙන් 8 දෙනෙකුගෙන් සමන්විත කණ්ඩායමක් ඕමාන් සලාම් ගුවන් යානය මගින් මෙරටට පැමිණි අතර තවත් කාන්තාවන් 6 දෙනෙකු 2023.01.02 (දින) දිවයිනට පැමිණීමට නියමිතව ඇත.
මෙයට අමතරව තානාපති කාර්යාලය මගින් කාර්යාංශයේ නීත්‍යානුකූලව ලියාපදිංචිය නොගත් සංචාරක වීසා මගින් ඕමානයේ රැකියා සඳහා ගොස් අතරමංව සිටි 18 දෙනෙකු ඔවුන්ගේ සේවාස්ථානයෙන් පැනයාම හේතුවෙන් එරට කම්කරු අමාත්‍යාංශය මගින් අසාධුලේඛනයට ඔවුන්ගේ නම් ඇතුලත් කර ඇති අතර, අදාල හාම්පුතුන්ගේ අවසරය මත ඔවුන් මෙරටට ගෙන්වීම සඳහා අවශ්‍ය කටයුතු සිදුකරමින් පවතින අතර, නීතිවිරෝධී ලෙස එරට රැඳී සිටින පිරිසක් වශයෙන් ඔවුන් මෙරටට පැමිණීම සඳහා ගුවන් ටිකට්පත් සැපයීම ඔවුන්ගේ පවුලේ ඥාතීන් විසින් සැලසිය යුතුව ඇත.
මේ සම්බන්ධයෙන් වැඩිදුර විමර්ශන කටයුතු සඳහා ඕමානය වෙත ගොස් සිටි අපරාධ පරීක්ෂණ දෙපාර්තමේන්තුවේ හා ශ්‍රී ලංකා විදේශ සේවා කාර්යාංශ නිළධාරීන්ගේ වාර්තාවට අනුව, කාන්තා සුරක්ෂා රැඳවුම් නිවාසයේ රැඳී සිටි කාන්තාවන් 86 දෙනා අතුරින් කාන්තාවන් 24 දෙනෙකු තමන්ගේ ඥාතීන්, හිතවතුන් බැලීම හා තම ව්‍යාපාර සඳහා භාණ්ඩ රැගෙන ඒම ආදී වූ පුද්ගලික හේතු දක්වමින් සංචාරයක් සිදුකිරීමට යන මුවාවෙන් නීතිවිරෝධී ලෙස විදේශ රැකියාවන් සඳහා යොමු වූ අයවු අතර, කාන්තාවන් 13 දෙනෙකු ඩුබායි රාජ්‍යය හරහා සහ සෘජුවම ඕමාන් රාජ්‍යයට සංචාරක වීසා පත් මගින් විදේශගත වූවන් වේ.
මෙම වාර්තාව අනුව ඔවුන් ඒ සඳහා යොමුකළ තැනැත්තන් සම්බන්ධයෙන් යොමු කිරීමට පහසුකම් සැලසූ විදේශ රැකියා ආයතන හෝ පුද්ගලයන් සම්බන්ධයෙන් තවදුරටත් ඉදිරි විමර්ශන කටයුතු සිදුකර ඔවුන් නීතිය ඉදිරියට පැමිණවීමේ කටයුතු මේ වනවිට ආරම්භ කර ඇති අතර, මේවන විට නීත්‍යානුකූල නොවන පරිදි සංචාරක වීසා මගින් විදේශගත වී සිටින සියළුම කාන්තාවන් අසාධු ලේඛනගත කිරීමටත්, ඔවුන්ට එරෙහිව කාර්යාංශ පනතේ ප්‍රතිපාදනයට යටත්ව නීතිමය පියවර ගැනීමටත් තීරණය කර ඇත.
මෙහිදී කාර්යාංශ ලියාපදිංචිය ලබා විදේශගතව සේවා ස්ථානයේ පැවති කරදර හේතුවෙන් තානාපති කාර්යාලයට වාර්තා කර ඇති 61 දෙනෙකුගේ ගැටළු විසඳීම සඳහා අවශ්‍ය කඩිනම් පියවර ගැනීමට විෂයභාර අමාත්‍යවරයා විසින් කාර්යාංශ නිළධාරීන් වෙත උපදෙස් ලබාදී ඇති අතර, ඔවුන් මෙරටට රැගෙන ඒම සඳහා ඕමාන් රාජ්‍යයේ පවතින නීතිරීති වලට යටත්ව මෙම කටයුතු සිදුකිරීමේ පහසුකම් මේ වන විට සලසා ඇත. එහෙත් එසේ තිබියදී ඔවුන් මෙරටට ගෙන්වීමේ කටයුතු කඩිනම් කරන ලෙසට බලකරමින් ඕමාන් ශ්‍රී ලංකා තානාපති කාර්යාලයේ තානාපතිවරයා ඉදිරියේ කළහකාරී ලෙස හැසිරීමෙන් හා ආයතනයේ දේපළ වලට හානිකරමින් හැසිරුණු 20 දෙනෙකුගෙන් යුතු කණ්ඩායමක් එරට පොලීසිය විසින් අත්අඩංගුවට ගෙන ඔවුන් නැවත මෙරටට පැමිණිම අත්හිටුවමින් අසාධුගත ලේඛනයට ඇතුලත්කර ඇත. ඔවුන්ට මෙරටට පැමිණීමට ගුවන් ටිකට්පත් ලබාදෙන ලෙසට ඔවුන්ගේ ඥාතීන් වෙත දැනුම්දෙන ලෙස කාර්යාංශයෙන් ඉල්ලීමක්ද කර ඇත.
තවද, සංචාරක වීසා මගින් විදේශගත වූ කාන්තාවන්ගේ වීසාපතෙහි කාලසීමාව අවසන්වීම හේතුවෙන්, ඕමාන් රාජ්‍යයේ රැඳී සිටින කාලසීමාවට අනුව නියමිත වීසා දඩමුදල් ගාස්තු එරට රජයෙන් නිදහස් කර ගැනීමටත්, සේවා ස්ථානයෙන් පැනඑන ලද කාන්තාවන් 18 දෙනෙකුගේ ගමන් බලපත්‍ර නොමැතිවීම හේතුවෙන් තාවකාලික ගමන් බලපත්‍ර ඔවුන් වෙත ලබාදීමට සහ ඔවුන් මෙරටට ගෙන්වාගැනීම සඳහා අවශ්‍ය ගුවන්ටිකට්පත් ලබාදීමේ කටයුතු කම්කරු හා විදේශ රැකියා අමාත්‍ය මනූෂ නානායක්කාර මහතාගේ උපදෙස් පරිදි සිදුකිරීමටත් ඒ අනුව, ඉදිරි කෙටිකාලයක් තුලදී මෙරටට ගෙන්වීමේ ගුවන්ටිකටිපත් ලබාදීමටත් කාර්යාංශය මේ වන විට පියවර ගෙන ඇත.
