ශ්‍රී ලංකාවේ ජනගහනයෙන් හරි අඩකටත් වැඩි ප්‍රමාණයක් දරිද්‍රතාවයට ගොදුරු වී ඇති බව එක්සත් ජාතීන්ගේ නවතම වාර්තාවකින් හෙළි වී තිබේ.
එක්සත් ජාතීන්ගේ සංවර්ධන වැඩසටහන (UNDP) විසින් සකස් කරන ලද ශ්‍රී ලංකාවේ, බහුමාන අවදානම් දර්ශකය (MVI) ට අනුව රටේ ජනගහනයෙන් 55.7% ක ප්‍රතිශතයක් දරිද්‍රතාවයට ගොදුරු වී ඇති අතර ඒ අනුව ආසන්න වශයෙන් සෑම පුද්ගලයන් 10 දෙනකුගෙන් 6 දෙනෙක් දරිද්‍රතාවයට ගොදුරු වී සිටිති.
දරිද්‍රතාවයට බලපාන ක්ෂේත්‍ර 12 ක් පදනම් කරගනිමින් සිදු කළ මෙම අධ්‍යයනයේදී හෙළි වී ඇත්තේ පුද්ගලයන් 10 දෙනෙකුගෙන් 6 දෙනෙකු දරිද්‍රතාවයට ලක් වීම සදහා එක් අයෙකුට අවම වශයෙන් එම ක්ෂේත්‍ර 12 න් 3 වත් බලපා ඇති බවයි.
ශ්‍රී ලංකාවේ ජනගහනයෙන් මිලියන 10.13 ක් ග්‍රාමීය ප්‍රදේශවල ජීවත් වන බව පෙන්වා දෙන එක්සත් ජාතීන්ගේ සංවර්ධන වැඩසටහන නිකුත් කළ වාර්තාවට අනුව ඔවුන් ජීවත් වන්නේ උතුරු, නැගෙනහිර සහ උතුරු මැද යන පළාත් 3 තුළය.
මලෛයහ දෙමළ ජනතාවට ද ශ්‍රී ලංකාව මුහුණ දී සිටින දරිද්‍රතාවයෙන් වැඩි බලපෑමකට මුහුණ දීමට සිදුව ඇති බව එක්සත් ජාතීන්ගේ සංවර්ධන වැඩසටහන (UNDP) විසින් සකස් කරන ලද ශ්‍රී ලංකාවේ බහුමාන අවදානම් දර්ශකය (MVI) යේ සදහන්ය.
ඒ අනුව ග්‍රාමිය ප්‍රදේශ තුළ ජනතාව දරිද්‍රතාවයට ගොදුරු වීමට බලපා ඇති මුලික හේතු තුනකි. ණය බර, ස්වාභාවික විපත් වලට මුහුණ දීමට ඇති නොහැකියාව සහ ජල සම්පත සොයා ගැනීමට ඇති අපහසුතාවයන්ය.
ජාතික මට්ටමේ දරිද්‍රතාවය සදහා ද මුලික සාධක තුනක් බලපා ඇති අතර ණය බර, ස්වාභාවික විපත් වලට මුහුණ දීමට ඇති නොහැකියාව සහ අධ්‍යාපනය අහිමි වීමයි.
මේ සියළු සාධක අතුරින් දරිද්‍රතාවය සදහා බලපා ඇති ප්‍රධානතම හේතුව ලෙස එක්සත් ජාතීන්ගේ සංවර්ධන වැඩසටහන පෙන්වා දී ඇත්තේ නිවාස ණයයි.
ශ්‍රී ලංකාවේ පුද්ගලයන් තිදෙනෙකුගෙන් එක් අයෙකුට (33.4%) ආහාර, වෛද්‍ය පහසුකම් සහ අධ්‍යාපනය සදහා තමන් සන්තකයේ පවතින ස්වරණාභරණ උකස් තැබීමට හෝ විකුණා දැමීමට සිදුවීමෙන් පීඩාවට පත්ව සිටී.
මේ වන විට ශ්‍රී ලංකාවේ පවතින ආර්ථික අර්බුදය හේතුවෙන් ණය බර උග්‍ර වී දරිද්‍රතා මට්ටම තවත් ඉහළට යනු ඇති බවට එක්සත් ජාතීන්ගේ සංවර්ධන වැඩසටහන අනතුරු අගවා තිබේ.
ඔවුන් තව දුරටත් පෙන්වා දෙන්නේ ශ්‍රී ලංකාවේ ජනගහනයෙන් අඩක්වත් ස්වාභාවික විපත් සදහා මුහුණ දීමට සුදානමකින් පසු නොවන බවයි. කාලගුණික විපර්යාස හේතුවෙන් ඔවුන් මුහුණ දෙන බලපෑම් තවත් වැඩි වී ඇති බව එහි සදහන්ය.
ශ්‍රී ලංකාවේ පිරිමි සහ ගැහැණු දරුවන් පාසල් යන කාලය සම්බන්ධයෙන්ද විස්තර ඇතුලත් බහුමාන අවදානම් දර්ශකය පෙන්වා දෙන්නේ ඔවුන්ගේ අධ්‍යාපන මට්ටම වැඩි දියුණු කරගැනීම සදහා වැදගත් ක්‍රියාමාර්ග කිහිපයක් වහාම ගත යුතු බවයි.
දෛනික භාවිතය සදහා අවශ්‍ය ජලය සොයා ගැනීමේ දී ශ්‍රී ලංකාවේ ජනගහනයෙන් 35.6 % ප්‍රතිශතයක් ගැටළු වලට මුහුණ පාන බව මෙම වාර්තාවේ වැඩි දුරටත් සදහන්ව තිබේ. ඔවුන් සම්බන්ධයෙන් කඩිනමින් අවධානය යොමු කර එම ජනතාවට අපහසුතාවයෙන් තොරව ජලය ලබා ගැනීමට වැඩ සටහන් සකස් කළ යුතු බවට එක්සත් ජාතීන්ගේ සංවර්ධන වැඩසටහන සිය වාර්තාව මගින් ආණ්ඩුවට නිර්දේශ ඇත.
අම්පාර, මඩකලපුව, කිලිනොච්චි, මුලතිව්, වව්නියා, පුත්තලම සහ නුවර එළිය ප්‍රදේශයේ ජීවත් වන ජනතාවගෙන් තුනෙන් දෙකක පිරිසක් දරිද්‍රතාවයෙන් පීඩා විදින බව පෙන්වා දෙන එක්සත් ජාතීන්ගේ සංවර්ධන වැඩසටහන මෙවැනි අර්බුදවලින් ජනතාව ගොඩ ගැනීමට අවශ්‍ය නිර්දේශ සහ යෝජනාද සිය වාර්තාව මගින් ආණ්ඩුවට දැනුම් දී තිබේ.
එම ක්‍රියා මාර්ග දිගු කාලීන පදනමක් මත තිරසාර විය යුතු බවද එක්සත් ජාතීන්ගේ සංවර්ධන වැඩසටහන වැඩි දුරටත් කියා සිටි.
අනාගතයේදී ශ්‍රී ලංකාව වඩාත් තිරසාර රටක් බවට පත් කිරීමටනම් මෙම ගැටළු වල බහු විධ තාවය සහ සංකීර්ණභාවය අවබෝධ කරගනිමින්, මේ සදහා ජාත්‍යන්තර පාර්ශව කරුවන් ද සම්බන්ධකරගනිමින් ඉලක්කයක් සහිතව කටයුතු කළ යුතු බව පෙන්වා දෙන එක්සත් ජාතීන්ගේ සංවර්ධන වැඩසටහන ලංකා ආණ්ඩුවට අවධාරණය කර ඇත්තේ අවදානම අඩුකරගනිමින් ඒකාබද්ධ වැඩසටහනක් හරහා ඉලක්කය වෙත ලඟා විය හැක්කේ ඒ ආකාරයෙන් පමණක් බවයි.
