ශ්‍රී ලංකාවේ සියලු දිස්ත්‍රික්ක වලින් කොරෝනා වෛරස් ආසාදිතයන් වාර්තාවී තිබියදීත් නිදහස් දින පෙළපාලියේ පුහුණු කටයුතු සදහා පාසල් සිසුන් යොදා ගැනීමට ගෙන ඇති තීරණය දිවයිනේ ප්‍රමුඛතම ගුරු සංගමයක කනස්සල්ලට හේතුවී තිබේ.
පෙළපාලියේ පුහුණු කටයුතු සදහා පාසල් සිසුන් යොදා ගැනීම අධ්‍යාපන අමාත්‍යාංශයේ ලේකම්වරයා විසින්ම ප්‍රතික්ෂේප කර තිබියදීත් පුහුණු කටයුතු සදහා සිසුන් යොදා ගැනීම ඔවුන් අනතුර වෙත තල්ලුකිරීමක් බවයි ලංකා ගුරු සංගමය පවසන්නේ.
"73 වන ජාතික නිදහස් දින පෙළපාලිය සදහා ශිෂ්‍යභට/භටවියන් සහභාගී කරවීම " හිසින් යුතුව ආරක්ෂක අමාත්‍යාංශයේ ලේකම් වෙත ජනවාරි මස 20 දින ලිපියක් යොමු කරමින් අධ්‍යාපන අමාත්‍යාංශයේ ලේකම් කේ. කපිල සී.කේ පෙරේරා දැනුම් දී ඇත්තේ පුහුණු කටයුතු සදහා සිසුන් යොදා ගැනීමට අවසර දිය නොහැකි බවයි.
"පවත්නා covid-19 වසංගත තත්වය හමුවේ මෙවන් දිර්ඝ කාලීන කදවුරුගත වීම් දැඩි අවධානමක් සහිත බව සෞඛ්‍ය අමාත්‍යාංශයේ පාසල් සෞඛ්‍ය ඒකකය මෙම අමාත්‍යාංශයේ සෞඛ්‍ය හා පෝෂණ ශාඛාව වෙත දන්වා ඇත. ඒ අනුව ඔබගේ ඉල්ලීමට මෙම අමාත්‍යාංශයට අවසර ලබා දිය නොහැකි බව කාරුණිකව දන්වා සිටිමි."
එම ලිපියේ සදහන් පරිදි මෙවර ජාතික නිදහස් දින පෙළපාලි පුහුණුව සදහා දිවයිනේ සියලු ප්‍රදේශ ආවරණය වන පරිදි පාසල් 152 ක පමණ නියෝජනයක් සහිතව පාසල් ශිෂ්‍යභට/ භටවියන් 300 දෙනෙකු තෝරාගෙන තිබේ.
පෙළපාලි පුහුණු කටයුතු සදහා සිසුන් යොදා ගැනීම සම්බන්ධයෙන් අධ්‍යාපන අමාත්‍යාංශයේ ලේකම්වරයාගේ ලිඛිත විරෝධය පළ වී දිනකට පසුව අධ්‍යාපන අමාත්‍යාංශය තම තීරණය වෙනස් කර තිබේ.
ජාතික ශිෂ්‍යභට බලකායේ අධ්‍යක්ෂ වෙත ලිපියක් යොමු කරමින් අධ්‍යාපන ලේකම් වෙනුවට අතිරේක ලේකම් (පාසල් කටයුතු) එල්.එම්.ඩී ධර්මසේන දැනුම් දී ඇත්තේ සෞඛ්‍ය අධ්‍යක්ෂ ජනරාල්ගේ අනුමැතියට හා පහත නිර්ණායක වලට යටත්ව සිසුන් සහභාගි කරවීම සම්බන්ධයෙන් කිසිදු විරෝධතාවයක් නොමැති බවයි.
01. සෞඛ්‍ය අධ්‍යක්ෂ ජනරාල් විසින් මේ සදහා අනුමැතිය ලබා දුන් ලිපියේ පිටපතක් අධ්‍යාපන ලේකම්, පළාත් අධ්‍යාපන අධ්‍යක්ෂවරු, පළාත් අධ්‍යාපන ලේකම්වරු සහ අදාල පාසල් වල සියළුම විදුහල්පතිවරුන් වෙත යැවිය යුතුය,
02. සියළු ක්‍රියාකාරකම් සෞඛ්‍ය අමාතාංශයේ සෞඛ්‍ය අධ්‍යක්ෂ ජනරාල් විසින් ඉදිරිපත් කර නිකුත් කර ඇති චක්‍රලේඛයට අනුව සිදු විය යුතුය,
03. අදාල පාසල් වල විදුහල්පතිවරුන්ගේ අවසරය ලබා ගත යුතුය,
04. දෙමව්පිය පුර්ණ අවසරය ලිඛිතව ලබා ගත යුතුය,
05.එක් එක් පාසලේ සිසුන්භාරව ගුරුභවතෙක් අනිවාර්යෙන්ම සහභාගී විය යුතුය,
06. සිසුන් නේවාසික කඳවුරුගත කරන්නේ නම් අදාළ සෞඛ්‍ය බලධාරීන්ගෙන් උපදෙස් ලබාගෙන ඒ අනුවම කටයුතු කිරීමට විශේෂයෙන්ම වග බලා ගත යුතුය,
07. මෙම වැඩ සටහන අතරතුරදී කොවිඩ් 19 සිසුවකු හදුනා ගතහොත් අදාළ ප්‍රදේශයේ සෞඛ්‍ය වෛද්‍ය නිලධාරී දැනුවත් කර යුතුය.
"73 වන නිදහස් දින පෙළපාලිය සදහා ශිෂ්‍යභට/භටවියන් කදවුරු ගත පුහුණුව හෝ ඒ සදහා සහභාගීවීමේදී කොවිඩ් 19 වසංගතය දරුවන් වෙත ඇති නොවීමට කටයුතු කිරීම ඔබගේ වගකීම බව මෙහිලා විශේෂයෙන් සදහන් කරමි. " එල්.එම්.ඩී ධර්මසේන ජාතික ශිෂ්‍යභට බලකායේ අධ්‍යක්ෂ වෙත වැඩි දුරටත් දැනුම් දී තිබේ.
එමෙන්ම බ්‍රිගේඩියර් පුහුණු විසින් බ්‍රිගේඩියර් පාලන වෙත යොමු කර තිබෙන පණිවිඩයක සදහන් පරිදි නිදහස් දින පෙළපාලි පුහුණු කදවුර 2021 ජනවාරි මස 25 දින සිට පෙබරවාරි 4 දක්වා කොළඹ නාලන්ද විද්‍යාලයේදී සහ ආනන්ද බාලිකා විද්‍යාලයේදී පැවැත්වීමට කටයුතු යොදා තිබේ.
2021 ජනවාරි මස 24 දින සිට ඉහත සදහන් විද්‍යාලයන්හි කදවුරු ස්ථාපිත කිරීමට කටයුතු කළ යුතු බවටත් එමගින් නියෝග ලබා දී තිබේ.
දැඩි වසංගත අවදානමක් රටේ පවතින මොහොතක සිසුන් 300 ක පිරිසක් එක්තැන් කරමින් සිදු කරන පුහුණු කිරීම " නොකළ යුත්තක්" ලෙසින් පෙන්වා දෙන ලංකා ගුරු සංගමයේ ප්‍රධාන ලේකම් ජෝසප් ස්ටාලින් බලධාරීන්ගෙන් ඉල්ලා සිටින්නේ මෙම පුහුණුව සම්බන්ධයෙන් නැවත සලකා බලන ලෙසයි.
සිසුන් සමග අවම වශයෙන් ගුරුවරුන්ද 150 ට අධික පිරිසකට ඉහත පාසල් දෙකේ කදවුරුගත වීමට සිදු වන බව පෙන්වා දෙන ජ්‍යෙස්ඨ වෘත්තිය සමිති නායකයා ප්‍රශ්න කරන්නේ ඔවුන්ගේ වගකීම බාර ගන්නේ කවුරුන්ද යනුවෙනි.
පාසල් සිසුන් වසංගත අනතුරට තල්ලු කරනවා වෙනුවට ඔවුන් වසංගත අනතුරෙන් ගලවා ගැනීමේ වැදගත්කම ගුරු සංගම් නායකයා තව දුරටත් අවධාරණය කර සිටි.
(ද ලීඩර්)
