ශ්‍රී ලංකාවේ කෝවිඩ් වසංගතය සීඝ්‍ර ව්‍යාප්තියට පත් වෙමින් තිබෙන අවස්ථාවක ඒ පිළිබඳව කල්තියා දැනුම් දීම සඳහා දත්ත නිවැරදිව කළමනාකරණය කර ගැනීම සඳහා අත්‍යාවශ්‍ය පහසුකම් ලබාගැනීමට බාධා පැමිණ ඇති බව වෛද්‍ය රසායනාගාර විද්‍යාඥයෝ පෙන්වා දෙති.
නමුත් මේ වන විට රසායනාගාරවල PCR ධාරිතාව ඉක්මවා ඇති බැවින් ද, PCR මත පමණක් යැපීම හේතුවෙන්ද, ආවේක්ෂණ ක්‍රියාවලියකට අවශ්‍ය පරීක්ෂණ ක්‍රියාවලිය පූර්ණ වශයෙන් අකර්මණ්‍ය කර ඇති බවයි රජයේ වෛද්‍ය රසායනාගාර විද්‍යාඥ සංගමය පවසන්නේ.
අහඹු පරීක්ෂණ සක්‍රිය හා අක්‍රිය පරීක්ෂණවල ප්‍රගමනයන් පිළිබඳව වසංගත රෝග අංශය දිනපතා වාර්තා කළ යුතු නමුත් එවැනි තත්වයක් දක්නට නැති බවටත් රජයේ වෛද්‍ය රසායනාගාර විද්‍යාඥ සංගමයේ සභාපති රවී කුමුදේශ් චෝදනා කරයි.
"එසේම මෙම දත්ත හා තොරතුරු ඒකරාශී කර නොගැනීම නිසා අද වන විට ශ්‍රී ලංකාව තුළ වසංගතය පුරෝකථය කිරීම අසිරු වී ඇත."
එමෙන්ම ඒකරාශී කරන ලද දත්ත හා තොරතුරු පවා කළමනාකරණය කර ගැනීම සඳහා විධිමත් තොරතුරු කලමනාකරණ පද්ධතියක් නොමැති වීමද මෙම අඩුපාඩුවට හේතුවක් බව රවී කුමුදේශ් වැඩි දුරටත් පෙන්වා දෙයි.
එසේම, ඉදිරියේදී ඇතිවන හා ඇතිවිය හැකි යැයි උපකල්පනය කරන අතිශය දරුණු තත්වයන් ප්‍රක්ෂේපණයන් නොකරමින් විද්‍යාත්මක ආවේක්ෂණය ට අවශ්‍ය පරිදි පරීක්ෂණ තොරතුරු ඒකරාශී කර ගැනීමටත්, ඒවා නිවැරදිව කළමනාකරණය කරමින් අත්‍යවශ්‍ය උපදෙස් රජයට සහ ජනාධිපතිවරයාට ලැබීමේ දුර්වල තත්වය හේතුවෙන් රජය සහ සෞඛ්‍ය අමාත්‍යාංශය මත දෙකක පිහිටා කටයුතු කිරීම රට බරපතළ අනතුරකට ලක් කිරීමක් විය හැකි බැවින් ඒ පිළිබඳව සෞඛ්‍ය අමාත්‍යාංශයේ දැඩි අවධානය යොමුවිය යුතු බවත් වෘත්තිය වේදියා වැඩි දුරටත් අවධාරණය කරති.
(ද ලීඩර්)
