සියවස් දෙකක් තිස්සේ මෙරට ජීවත් වන තමන්ට නිවසක් තනා ගැනීම සදහා ඔප්පු සහිතව පර්චස් 20 ක ඉඩමක් ලබා දෙන ලෙස බලකරමින් කුරුණෑගල දිස්ත්‍රික්කයේ පදිංචි මලය දෙමළ ජනතාව විරෝධයක් දියත් කර තිබේ.
මාවතගම පිහිටි වතු කිහිපයක මලෛයහ ප්‍රජාව ඔක්කෝබර් 5 වැනි බ්‍රහස්පතින්දා මාවතගම රඹුක්කන පාරේ පිටියකන්ද වතුයායට පිවිසෙන ස්ථානයේ එම විරෝධතාවය දියත් කළ බවයි පළාත් බද වාර්තාකරුවන් පවසන්නේ.
ලිපිනය අපේ අයිතියක්, පර්චස් 20ක ඉඩමක් ඕනෑ, අපේ අභිමානය අපට දියව්, ආදී සටන් පාඨ සහිත පුවරු ප්‍රදර්ශනය කරමින් ඔවුන් විරෝධය දියත් කර තිබේ.
විරෝධතාවයට එක්ව සිටි සමාජ ක්‍රියාධරයකු වන ජීවරත්නම් සුරේෂ් සදහන් කර ඇත්තේ, දෙමළ භාෂාවෙන් රාජකාරි කටයුත්තක් කරගැනීමට යාමේ දී රාජ්‍ය ආයතනතුල දී මලෛයහ දෙමළ ජනයා දැඩි අපහසුතාවලට පත්වෙන බවයි.
මාරාන්තික වසංගත සමයේදී පවා රටේ ආර්ථිකය ශක්තිමත් කිරීම වෙනුවෙන් වෙහෙසී ක්‍රියාකළ මලෛයහ තමිල් ප්‍රජාවට හිමි අභිමානය ලබා දිය යුතු බව ඔහු වැඩි දුරටත් පවසා තිබේ.
වයඹ පළාතේ ජීවත්වන මලෛයහ ප්‍රජාව 11000කට අධික බව අවධාරණය කරන ඔහු ඉල්ලා ඇත්තේ ඔවුන්ට ජීවත් විය හැකි පරිසරයක ඔප්පුවක් සහිත පර්චස් 20 බැගින් වූ ඉඩම් ලබා දෙන ලෙසයි.
මලය පිබිදීමේ පා ගමන
ලක්දිවට පා තබා වසර 200 ක් තිස්සේ මෙරට ජීවත් වන මලය රටේ දෙමළ ජනතාව ශ්‍රී ලංකාවේ අර්ථවත් පුරවැසියන් වීම සදහා රජයට ඉල්ලීම් 11 ක් ඉදිරිපත් කරමින් 2023 ජුලි 28 වැනිදා තලෙයිමන්නාරමේදී සමාරම්භක උත්සවය පැවැත්වු මලෛයහ දෙමළ ජනයා ජුලි 29 වැනිදා උදෑසන තලෙයිමන්නාරමෙන් ආරම්භ කළ පා ගමන කිලෝ මීටර 300 ට ආසන්න දුරක් ගෙවා දමමින් මාතලේට පැමිණිමෙන් අනතුරුව නිමා කර තිබුනේ අගෝස්තු 12 වැනි දිනයි.
ශ්‍රී ලංකාවේ විශාලතම සමූහ සුසාන හමුවූ දිස්ත්‍රික්ක දෙක වන්නේද මන්නාරම හා මාතලේයි.
සිය ඉතිහාසය අරගලය සහ දායකත්වය පිළි ගැනීම, අනෙකුත් ප්‍රධාන ප්‍රජාවන් හා සමානව වෙනමම අනන්‍යතාව සහිත නිදහස් ශ්‍රී ලංකාවේ ජන කොටසක් ලෙස පිළි ගැනීම, ජාතික මට්ටමේ සාමාන්‍යය හා සමාන මට්ටමක් ළඟාකර ගැනීමට අධ්‍යාපනය සෞඛ්‍යය සහ සමාජ ආරක්ෂණයන් සම්බන්ධ සාධනීය ක්‍රියාමාර්ග, ජීවත්වීමට සරිලන වැටුපක් ගෞරවනීය රැකියා නෛතික ආරක්ෂාව සහ පිරිමි හා කාන්තා කම්කරුවන්ට සමාන වැටුප්, නිවාස සහ ජීවනෝපාය සඳහා සුරක්ෂිත හිමිකමක් සහිත ඉඩම්, දෙමළ භාෂාව සමාන ලෙස භාවිතය සහ ඒ සඳහා සමාන තත්වයක්, රාජ්‍ය සේවා වෙත සමාන ප්‍රවේශය, වැවිලි අංශයේ ජනාවාස නව ගම්මාන ලෙස සීමා නීර්ණය කිරීම, ගෘහස්ථ සේවකයන් ආරක්ෂා කිරීම, මලෛයහ සංස්කෘතිය සංරක්ෂණය හා ප්‍රවර්ධනය කිරීම, රාජ්‍ය පාලනයේ සෑම මට්ටමකදීම අර්ථවත් පාලන කාර්යභාරයක් හිමිවන පරිදි සමානාත්මතාව සහිත සහ අන්තර්කරණය වූ මැතිවරණ ක්‍රමයක් සහ බලය බෙදීමක්, ශ්‍රී ලංකාවේ අර්ථවත් පුරවැසියන් වීම සදහා මලෛයහ දෙමළ ජනතාව ඉල්ලා සිටින මුලික ඉල්ලීම් වේ.
(the leader)
