මලය කඳුරට දෙමළ ජනතාවගේ අනන්‍යතාව වසං කිරීමේ උත්සාහයක් ගැන ශ්‍රී ලංකාවේ පුද්ගලයන් ලියාපදිංචි කිරීමේ බලධාරියා වතුකරයේ ප්‍රධානතම වෘත්තීය සමිතියේ දෝෂ දර්ශනයට ලක් වී සිටී.
ශ්‍රී ලංකාවේ ජීවත් වන ඉන්දියානු සම්භවයක් සහිත දෙමළ හා මුස්ලිම් ජනයාගේ උප්පැන්න සහ මරණ සහතිකවල ජාතිය සඳහන් කිරීම සම්බන්ධයෙන් රෙජිස්ට්‍රාර් ජනරාල් දෙපාර්තමේන්තුව මාස නමයකට ඉහත දී නිකුත් කර ඇති චක්‍රලේඛයක් නැගෙනහිර පළාත් ආණ්ඩුකාරවරයාද වන ශ්‍රී ලංකා කම්කරු කොංග්‍රසයේ සභාපතිවරයා තරයේ හෙළා දැක තිබේ.
ජාතිය දැක්වීමේ දී "ඉන්දීය දෙමළ/යෝනක" යන්න "ලාංකික දෙමළ/යෝනක" ලෙස භාවිත කිරීමට අදාල ප්‍රතිපාදන මැයෙන් 2023 ජනවාරි 12 වැනිදා සියළුම ප්‍රාදේශිය ලේකම්වරුන්, දිස්ත්‍රික් රෙජිස්ට්‍රාර්වරුන් මගින් අතිරේක දිස්ත්‍රික් රෙජිස්ට්‍රාර්වරුන් වෙත යොමු කළ චක්‍රලේඛයක් මගින් නියම කර තිබුනේ පරම්පරා දෙකක් ලංකාවේ ඉපදී ඇත්තා වු ඉන්දිය ජාතිකයන්ට ලාංකික ලෙස භාවිත කරන ලෙසයි.
"පුරවැසි භාවය ලබා ගැනීම යමෙකුගේ වර්ගීය සංහතිය කෙරෙහි බලනොපාන බැවින් පුරවැසිභාවය පිළිබද තත්වය සැලකිල්ලට නොගෙන ඉන්දියානු ජාතිකයන් වන දෙමළ සහ යෝනක මිනිසුන් "ඉන්දියානු දෙමළ" හෝ "ඉන්දියානු යෝනක" යනුවෙන් හැදින්විය යුතු අතර පෙර පරම්පරා දෙකක් (පියා සහ මුත්තා) ලංකාවේ ඉපදී ඇත්තා වු දෙමළ හා යෝනක පුද්ගලයන් "ලාංකික දෙමළ" හෝ "ලාංකික යෝනක " යනුවෙන් හැදින්විය යුතු වේ." රෙජිස්ට්‍රාර් ජනරාල් පී.එස්.පී අබේවර්ධන සිය චක්‍රලේඛයේ සඳහන් කරයි.
ඒ අනුව මින් ඉදිරියට උක්ත සංශෝධනය මත පදනම්ව 1951 අංක 17 දරණ උප්පැන්න හා මරණ ලියාපදිංචි කිරීමේ පනතේ ප්‍රතිපාදනයන්ට යටත්ව උප්පැන්න ලේඛනයක ජාතිය සටහන් කිරීම හෝ සංශෝධනය කිරීම සිදු කළ යුතු බවත් මෙම ක්‍රියාවලිය උප්පැන්න ලේඛනයෙහි ජාතිය සටහන් කිරීමක් හෝ සංශෝධනයක් සම්බන්ධයෙන් අදාල වන අතර එම පාර්ශවයට අදාල අනෙකුත් සියලු ලේඛනයන් හි ජාතිය උප්පැන්න ලේඛනය අනුව විය යුතුය යන්න එහි තව දුරටත් දැක්වේ.
ලංකා කම්කරු කොංග්‍රසයේ සභාපති ලෙස සෙන්තිල් තොණ්ඩමාන් අවධාරණය කර ඇත්තේ උප්පැන්න සහ මරණ සහතිකවල ජාතිය සඳහන් කිරීම සම්බන්ධයෙන් චක්‍රලේඛ නිකුත් කිරීමට රෙජිස්ට්‍රාර් ජනරාල් දෙපාර්තමේන්තුවට අයිතියක් නැති බවයි.
මේ රටේ පුරවැසියෙකු ලෙස සෑම කෙනෙකුටම තම උප්පැන්න සහ මරණ සහතිකවල ශ්‍රී ලාංකිකයකු ලෙස තම ජාතිය සඳහන් කිරීමට අයිතියක් ඇති බව පෙන්වා දෙන ආණ්ඩුකාරවරයා, ජාතියේ අනන්‍යතාවය තීරණය කිරීමට තෙවන පාර්ශවයන්ට අයිතියක් නැති බව අවධාරණය කර සිටී.
“සකල ශ්‍රී ලංකා වාසීන් සතු සිය ප්‍රජාවේ අනන්‍යතාව තීරණය කිරීමේ ස්වාධිපත්‍යය ඇතුළු මූලික අයිතිවාසිකම් ගැන අපි තරයේ විශ්වාස කරමු. එකී තීන්දු නිසර්ගයෙන්ම පෞද්ගලික වන අතර, පිටස්තරින් පනවනු ලැබීමට යටත් විය යුතු නැත. මේ නියෝගය ඉන්දීය සම්භවයක් සහිත දෙමළ ප්‍රජාවේ පුද්ගලයන්ගේ අයිතිවාසිකම්වලට තර්ජනයක් එල්ල කරනු පමණක් නොව, අපේ ප්‍රජාතන්ත්‍රවාදී සමාජය විසින් පිළිගනු ලබන නිදහස හා ස්වයං තීරණය පිළිබඳ පුළුල් මූලධර්ම සම්බන්ධයෙන්ද ගැටළු මතු කරයි,” යනුවෙන් සෙන්දිල් තොන්ඩමාන් ඔක්තෝබර් 18 වැනිදා රෙජිස්ට්‍රාර් ජනරාල් වෙත යවන ලද ලිපියක දැක්වේ.
1948 දී ප්‍රජා අයිතියක් නොමැතිව සිට වසර 40 කට ආසන්න කාලයක් ඉන්දියානු සම්භවයක් ඇති බවට පිළිගැනීමෙන් පසු ඔවුන් නැවත "ශ්‍රී ලාංකීය දෙමළ" ලෙස හඳුනා ගැනීමට උත්සාහ කිරීම ඔවුන්ගේ අනන්‍යතාව වසන් කිරීමේ ක්‍රියාවක් බව පෙන්වා දෙන සෙන්දිල් තොණ්ඩමාන් මෙවැනි චක්‍රලේඛ නිකුත් කිරීම තරයේ හෙළා දකින බවද අවධාරණය කර තිබේ.
මලය පිබිදීමේ පා ගමන
ලක්දිවට පා තබා වසර 200 ක් තිස්සේ මෙරට ජීවත් වන මලය රටේ දෙමළ ජනතාව ශ්‍රී ලංකාවේ අර්ථවත් පුරවැසියන් වීම සදහා රජයට ඉල්ලීම් 11 ක් ඉදිරිපත් කරමින් 2023 ජුලි 28 වැනිදා තලෙයිමන්නාරමේදී සමාරම්භක උත්සවය පැවැත්වු මලෛයහ දෙමළ ජනයා ජුලි 29 වැනිදා උදෑසන තලෙයිමන්නාරමෙන් ආරම්භ කළ පා ගමන කිලෝ මීටර 300 ට ආසන්න දුරක් ගෙවා දමමින් මාතලේට පැමිණිමෙන් අනතුරුව නිමා කර තිබුනේ අගෝස්තු 12 වැනි දිනයි.
ශ්‍රී ලංකාවේ විශාලතම සමූහ සුසාන හමුවූ දිස්ත්‍රික්ක දෙක වන්නේද මන්නාරම හා මාතලේයි.
සිය ඉතිහාසය අරගලය සහ දායකත්වය පිළි ගැනීම, අනෙකුත් ප්‍රධාන ප්‍රජාවන් හා සමානව වෙනමම අනන්‍යතාව සහිත නිදහස් ශ්‍රී ලංකාවේ ජන කොටසක් ලෙස පිළි ගැනීම, ජාතික මට්ටමේ සාමාන්‍යය හා සමාන මට්ටමක් ළඟාකර ගැනීමට අධ්‍යාපනය සෞඛ්‍යය සහ සමාජ ආරක්ෂණයන් සම්බන්ධ සාධනීය ක්‍රියාමාර්ග, ජීවත්වීමට සරිලන වැටුපක් ගෞරවනීය රැකියා නෛතික ආරක්ෂාව සහ පිරිමි හා කාන්තා කම්කරුවන්ට සමාන වැටුප්, නිවාස සහ ජීවනෝපාය සඳහා සුරක්ෂිත හිමිකමක් සහිත ඉඩම්, දෙමළ භාෂාව සමාන ලෙස භාවිතය සහ ඒ සඳහා සමාන තත්වයක්, රාජ්‍ය සේවා වෙත සමාන ප්‍රවේශය, වැවිලි අංශයේ ජනාවාස නව ගම්මාන ලෙස සීමා නීර්ණය කිරීම, ගෘහස්ථ සේවකයන් ආරක්ෂා කිරීම, මලෛයහ සංස්කෘතිය සංරක්ෂණය හා ප්‍රවර්ධනය කිරීම, රාජ්‍ය පාලනයේ සෑම මට්ටමකදීම අර්ථවත් පාලන කාර්යභාරයක් හිමිවන පරිදි සමානාත්මතාව සහිත සහ අන්තර්කරණය වූ මැතිවරණ ක්‍රමයක් සහ බලය බෙදීමක්, ශ්‍රී ලංකාවේ අර්ථවත් පුරවැසියන් වීම සදහා මලෛයහ දෙමළ ජනතාව ඉල්ලා සිටින මුලික ඉල්ලීම් වේ.
(the leader)
