රාජ්‍ය සේවක වැටුප රුපියල් විසි දහසකින් වැඩි කරන ලෙසට බල කරමින් රට පුරා හෙට (දෙසැ. 12) දින ක්‍රියාත්මක කරන අසනීප නිවාඩු වාර්තා කිරීමේ එක්දින වැඩ වර්ජනයට වෘත්තීය සමිති තුන්සීයකට වඩා සහය දෙන බව රාජ්‍ය හා පළාත් රාජ්‍ය සේවා වෘත්තීය සමිති එකමුතුව සඳහන් කරයි.
පාසල්, රෝහල් හා ප්‍රවාහන ක්ෂේත්‍රය හැර අනෙකුත් සියලු රාජ්‍ය ආයතන මෙම වෘත්තීය සමිති ක්‍රියාමාර්ගයට එක්ව සිටින බව එහි කැඳවුම්කරු චන්දන සූරියආරච්චි කියා සිටියි.
වැඩ වර්ජනයට සහය පළ කරමින් සියලු රාජ්‍ය ආයතන ඉදිරිපිට එදින පෙරවරු දහයේ සිට උද්ඝෝෂණ ව්‍යාපාර සංවිධානය කර ඇතැයි ද කැඳවුම්කරු කීවේ ය.
ජන හා සංඛ්‍යා ලේඛන දෙපාර්තමේන්තුවේ නවතම දත්තවලට අනුව හතර දෙනකුගෙන් යුත් පවුලක මාසික වියදම රුපියල් 102,912ක් වන බව පැවසූ හෙතෙම ඒ අනුව මාසික වැටුප් ලබන රාජ්‍ය සේවකයන්ට අය-වැය සම්මත කර ගැනීමට පෙර රුපියල් විසිදහසකින් වැටුප් වැඩි කළ යුතු බව සඳහන් කළේ ය.
