අම්මේ මං සුජාතා - අම්මගේ ලොකු දුව
මං ආයි කවදාවත් - ගමට නං එන්නේ නෑ
ලොකු දුව ගැන - ඔයාලට තිබුණු හීන
අහිංසක දුප්පත් හීන - ඒවා ඔක්කොම
මරලා දාපු මේ ලොකු දුව
ආයෙ කවදාවත් - එන්නේ නෑ ඔයාලගේ
නෙත් මායිමට - මට කොළඹ ආවම
හමු වුනා මහලොකු - සල්ලිකාරයෙක්
මං ඌව විශ්වාස කළා අම්මේ - මගේ පණ ටත් වඩා
ඒත් එක දවසක් - මං ආසාවෙන් කිව්වා
දරුවෙක් බඩට - ඇවිත් බව
ඒක මට සතුටක් උනත් - ඌට සතුටක් උනේ නෑ අම්මේ
ඌ බය වුණා
ඇයිද කියා අදටත් මම - දන්නේ නෑ අම්මේ
නැති කරගන්න කීව දරුගැබ - බඩටත් පයින් ගැහුවා
මං හිටියේ සිහි විකල්ලෙන් වගේ - බැරිම තැන මං ඌව එලෙව්වා
දන්නේ නෑ කොහෙද කියා - මං හෙව්වේ නෑ ඌව
වැලේ ගෙඩි වැලට බර නෑ කීවා වගේ
තාත්තෙක් ඕනෙ නෑ කියා - මං මගේ දරුවා බිහිකලා අම්මේ
පුතා දැන් ලොකුයි - හරියට අපේ ලොකු මල්ලි වගේමයි
පුතා දකිනවාරයක් පාසා - මට ලොකු මල්ලිව මතක් වෙනවා
ඒත් මං ගමට නම් - එන්නේ නැහැ කවදාවත් අම්මේ
පුතා දැන් ලොකුයි
අවලමේ ගිහින් සුජාතා - දරුවෙක් අරගෙන ගමට ආවා
කියයි වටපිට මිනිසුන් - ඔයාටයි අප්පච්චිටයි ඒක
දරාගන්න බැරි වෙයි අම්මේ - පිරිමි තවමත් සුදනුන්මයි
මගේ අම්මේ - අම්මේ මං ලොකුදුව සුජාතා.
අපි තාම ගල් යුගයේ අම්මේ
වැරැද්ද දකින්නේ - ගැහැණියගේ විතරයි
මොන පාදඩ වැඩේ කෙරුවත්
මගේ පුතා මට - බරක් නැහැ අම්මේ
මං එයා හදනවා - හැම ගැහැණියකටම
ගරු කරන පිරිමියෙක් ලෙස - කරදර වැඩි වුන නිසාම
මගේ හිතත් - ගලක් වගේ වෙලා අම්මේ
මට පුළුවන් තනියම - ජීවිතේ ගොඩගන්න
ජීවිතයේ වරද්දපු උන්ට - දඩුවම් ලබාදෙන්න
එකට මම මේ ගෙන්දගම් පොළොවේ - ඉන්නම ඕනෑ අම්මේ
මට සමාවෙන්න - ගමට එන්නේ නැතුවාට
| චන්ද්‍රා දේවනාරායන
