ලංකා මුහුදු සීමාව පැන මසුන් අල්ලන ඉන්දීය ධීවරයන් ගෙන් උතුරේ ධීවරයන්ට සිදුවූ අලාභානි වලට වන්දි ගෙවන ලෙස ඉන්දීය ආණ්ඩුවට ඉල්ලීමක් ඉදිරිපත්ව තිබේ.
මෙරට ඉන්දීය මහ කොමසාරිස් වරයා ඉන්දීය ධීවරයන්ගේ ගැටලුව විසදීමට සමත් නොවීම හේතුවෙන් යාපනය දිස්ත්‍රික් ධීවර සමුපකාර සමිති සම්මේලනයේ නියෝජිතයන් විසින් මෙම ඉල්ලීම ඉදිරිපත් කර ඇත්තේ යාපනේ ඉන්දීය උප කොමසාරිස් හමුවීමෙන් අනතුරුවයි.
``මේ ඉන්දීය ධීවරයින් අපේ අයගේ දැල් කපලා, බෝට්ටුවලට හානි කරලා තියෙනවා, ඒක නිසා අපේ ධීවරයෝ මුහුදු යන්න බියේ ඉන්නේ, අපිට මෙතෙක් වෙලා තියෙන අලාභය රුපියල් මිලියන 400 ක් විතර වෙනවා,`` යැයි යාපන දිසා ධීවර සමුපකාර සමිති සම්මේලනයේ ප්‍රධානි එන්. අන්නරාසා පවසයි.
මෙම මුදල මාසිකව ධීවරයන්ට ලබා දෙන ලෙස ධීවරයන් විසින් තම ඉල්ලීම ඉන්දීය මහ කොමසාරිස් කාර්යාලය වෙත ලිඛිතව බාර දී ඇත්තේ මුදල් අමාත්‍යවරයා දිල්ලිය බලා යාමට පෙර දින නොවැම්බර් 30 දාය.
නවදිල්ලියේදී බැසිල් රාජපක්ෂ අමාත්‍යවරයා එරට මුදල් ඇමතිනී නිර්මලා සීතාරාමන් සහ විදේශ අමාත්‍ය සුබ්‍රමනියම් ජයශන්කර් හමුවී තිබුණි.
එහිදී “ඉන්දියාව සමග ආර්ථික සහයෝගීතාව තවදුරටත් වර්ධනය කරගැනීමේ ක්‍රම සහ විධි” සාකච්ඡා කරන ලද බව රජය ප්‍රකාශයට පත් කර තිබේ. පෝක් සමුද්‍ර සන්ධිය දෙපස දෙරටේ ධීවර ප්‍රජාවන් අතර ගැටුමට තුඩුදී ඇති ඉන්දීය ට්‍රෝලර් ගැටලුව සම්බන්ධයෙන් කිසිදු එකඟතාවකට පැමිණි බවත් වාර්තා වී නැත.
මෙරට ඉන්දීය මහ කොමසාරිස් ගෝපාල් බග්ලේ පසුගිය 17 වැනිදා කොළඹදී හමුවූ උතුරේ ධීවර සංගම් නායකයන් අවධාරණය කර සිටියේ ඉන්දීය ධීවරයන්ගේ නීති විරෝධී ට්‍රෝලර් යාත්‍රා මෙරට මුහුදට පැමිණීම තහනම් කරන බවට ඉන්දියාව පොරොන්දු වී පස් වසක් ගත වුවද මෙතෙක් එය ඉටු කිරීමට සමත්ව නැති බවය.
උතුරේ ධීවර සංගම් එකතුව විසින් මුලතිව් සිට පේදුරුතුඩුව දක්වා බෝට්ටු පෙළපාලියක් පවත්වා දැක්වූ විරෝධතාවෙන් අනතුරුව දෙමළ ජාතික සන්ධානයේ පාර්ලිමේන්තු මන්ත්‍රී එම්. ඒ. සුමන්තිරන්ද ඔවුන් මෙරට ඉන්දීය මහ කොමසාරිස්වරයා හමුවට රැගෙන ගියේය.
``ට්‍රෝලර් යාත්‍රා එන එක තහනම් කරනවා කියලා පොරොන්දු වෙලා දැන් අවුරුදු පහක් ගෙවිලා ගිහින්, තවත් විනාඩි තුනක් වත් දෙන්න බැහැ,``යැයි ඉන්දිය මහ කොමසාරිස්වරයා හමුවේ උතුරේ ධිවර සංගම් එකතුවේ නායක ඇම්. පී. සුබ්‍රමානියම් පැවසීය.
ඉන්දියාවේ පොරොන්දු කඩ කිරීම ධීවර නියෝජිතයෝ පෙන්වා දීමත් සමගින් මහ කොමසාරිස් බග්ලේ කියා තිබුනේ නවදිල්ලියේ ඉන්දීය මධ්‍යම ආණ්ඩුවටත්, තමිල්නාඩු ප්‍රාන්ත ආණ්ඩුවටත් දන්වා වහා මෙම ගැටලුව විසදීමට පිළියම් යොදන බවය.
ඒ අනුව ඉන්දියාවේ සංචාරයක නිරතවූ මෙරට ඉන්දීය මහ කොමසාරිස් ගෝපාල් බක්ලේ ``ධීවර කටයුතුවල නිරත වීමේදී ආරක්ෂාව වැදගත්,``යැයි 21 වැනිදා රාමේශ්වරම් හි විවිධ ධීවර සමිති නියෝජිතයන් සමඟ සාකච්ඡාවක නිරත වෙමින් පැවසීය.
තමිල්නාඩු මහ ඇමති එම්. කේ. ස්ටාලින් සහ ධීවර අමාත්‍ය අනිතා ආර්. රාධක්‍රිෂ්ණන් හමුවූ මෙරට ඉන්දීය මහ කොමසාරිස් දෙරට අතර ධීවර ක්ෂේත්‍රයේ සහයෝගීතාවය මෙන්ම ඉන්දීය ධීවරයන්ගේ සුබසිද්ධියට අදාළ කරුණු ද සාකච්ඡා කළ බව ඉන්දීය විදේශ අමාත්‍යාංශය පවසයි.
ඉන්දීය මාධ්‍ය පවසන ආකාරයට ලංකා මුහුදට අනවසරයෙන් ඇතුල් වී මසුන් මරන ඉන්දීය ධීවරයන්ට එරෙහිව දැඩි දඩුවම් පමුණුවන බවට රාමේශ්වරම් ධීවර සංවර්ධන දෙපාර්තමේන්තුව විසින් අවවාද කරනු ලැබුවේ ඉන්දීය මහ කොමසාරිස්වරයාගේ ඉන්දීය සංචාරයට පෙරාතුවය.
``ඉන්දීය මුහුදු සීමාවෙන් ඔබ්බට ගොස් මාළු ඇල්ලීමේ යෙදන අයට දැඩි දඩුවම් දෙනවා,ඒ වගේම තහනම් ධීවර ආම්පන්න යොදා ගත්තොත්, බෝට්ටු පවා රාජසන්තක කරනවා.``යැයි ඉන්දීය ධීවර අධිකාරීන් පවසා සිටියේ පසුගිය 20 වැනිදා රාමේශ්වරම් ධීවර වරායට රැස් කළ ධිවරයින්,ධිවර සමිති නායකයන්, හා ඉන්දීය නාවික පොලීසිය හමුවේය.
මායිම් පැනීමත්,තහනම් ධීවර ආම්පන්න යොදා ගෙන මසුන් නොමරන බවටත් ඉන්දීය ධීවර සංගම් නායකයෝ සහ ධීවර බෝට්ටු හිමියන් මෙහිදී සහතිකවූ බව ඉන්දීය මාධ්‍ය වාර්තා කර තිබේ.
ඉන්දීය මහ කොමසාරිස්වරයා හමුවී කරුණු පැහැදිලි කිරීමෙන් පසු ගතවූ කාලයේදී, ඉන්දීය ධීවරයන්ගේ මෙරට මුහුදු සීමා මායිම් පැනීම අඩු වී ඇතැයි ජාතික ධිවර සහයෝගිතා ව්‍යාපාරයේ උතුරු නැගෙනහිර පළාත් සම්බන්ධිකාරක ඇන්තනි ජේසුදාසන් පවසයි.
