දින සීයක කාලයක් අඛණ්ඩ වෘත්තීය අරගලයක යෙදී සිටින ගුරු සමිති මර්දනය කිරීම සඳහා නායකයන්ට මඩ ගැසීම
ඇතුළු විවිධ කූඨ උපක්‍රම යොදමින් සිටින බවට ආණ්ඩුවට චෝදනා එල්ල වී තිබේ.
රාජ්‍ය හා පෞද්ගලික අංශයේ වෘත්තීය සමිති රැසක් චෝදනා කරන්නේ, ගුරු ප්‍රශ්නය නිවැරදිව හඳුනාගනිමින් එයට විසඳුම් දෙනු වෙනුවට ආණ්ඩුව ගුරු - විදුහල්පති සංධානයේ වෘත්තීය සමිති නායකයන්ට විවිධ මඩ හා අවලාද එල්ල කරමින්, වෘත්තීය සමිති ක්‍රියාකාරීන් මර්දනය කිරීමට විවිධ කූඨ උපක්‍රම යොදමින් සිටින බවයි.
සිල්වෙස්ටර් ජයකොඩි සහ රංජන් සේනානායක යන වෘත්තිය සමිති නායකයන්ගේ සමකැඳවුම්කාරකත්වයෙන් යුතු පොදු දේපළ හා මානව හිමිකම් සුරැකීමේ මධ්‍යස්ථානය ආණ්ඩුවේ මෙම ක්‍රියා කලාපය තරයේ ප්‍රතික්‍ෂේප කර ඇත්තේ ඔක්තෝබර් 18 වැනි දින නිවේදනයක් නිකුත් කරමිනි.
එම මධ්‍යස්ථානය පෙන්වා දෙන්නේ ගුරු - විදුහල්පති සංධානය සුබෝධනි වාර්තාව ක්‍රියාත්මක කරන මෙන් ඉල්ලා සිටිද්දී, ආණ්ඩුව පත්කර ඇති අනු කමිටුව එයින් භාගයකටත් අඩු ප්‍රදාන නිර්දේශ කළ අතර එයද අදියර කිහිපයකින් නිශ්චිත කාල රාමුවක් රහිතව ලබාදෙන බව ප්‍රකාශ කළ බවයි.
"ගුරු - විදුහල්පතිවරුන් වඩාත් නම්‍යශිලීවෙමින් එම ප්‍රදානිත මුදල පිළිගත්තද, එය එකවර ලබාදෙන මෙන් ඉල්ලා සිටින ලදී. නමුත් ඒ පිළිබඳව කිසිදු වගකිවයුතු, පිළිතුරක් ලබානොදී ආණ්ඩුව කල්මරමින් සිටී. දැන් නැවතත් අග්‍රාමාත්‍යවරයාගේ සාකච්ඡාවේදී එම මුදලම අදියර 03 කින් ලබාදීමට යෝජනාවී ඇත."
ගුරු වෘත්තීය සමිති සංධානය එය ප්‍රතික්‍ෂේප කර ඇති බැවින් ආණ්ඩුව කළ යුත්තේ විවිධ උපක්‍රම යොදා වෘත්තීය සමිති භේද භින්න කිරීමට හෝ මර්දනය කිරීමට උත්සාහ දැරීම නොව දරුවන්ගේ අධ්‍යාපනය වෙනුවෙන් වගකියන බලධාරීන් පිරිසක් ලෙස ගුරුවන්ගේ මෙම ඉල්ලීමේ සැබෑ අවශ්‍යතාවය තේරුම්ගෙන ඔවුන්ට පිළිගත හැකි සාධාරණ විසඳුමක් ලබාදීම බවයි පොදු දේපල හා මානව හිමිකම් සුරැකීමේ මධ්‍යස්ථානය පවසන්නේ.
ඔවුන් තව දුරටත් චෝදනා කරන්නේ ආණ්ඩුව ඒ වෙනුවට වෘත්තිය සමිති නායකයන් මර්දනය කිරීමේ වැඩ පිළිවෙලක නිරත වී සිටින බවයි.
"ඒ වෙනුවෙන් ප්‍රාදේශීය දේශපාලඥයන් යොදා ගෙන බලහත්කාරයෙන් පාසැල් විවෘත කිරීම, ජෝසප් ස්ටාලින්, මහින්ද ජයසිංහ ඇතුළු ගුරු සංගම් නායකයන්ට විවිධ අවලාද නැගීම, වෘත්තීය සමිති ක්‍රියාමාර්ගවල නිරතවු ගුරු සංගම් ක්‍රියාකාරීන්ව නීතියට වංගු දමමින් මර්දනය කිරීමට උත්සාහ කිරීම ප්‍රශ්නය වඩාත් බරපතළ කරවන්නක් බව කිව යුතුය."
එබැවින් ගුරු වෘත්තීය සංගම් හා වහා එකඟත්වයකට එළඹෙමින් මෙම ගැටලුව ඔවුන්ට පිළිගත හැකි ආකාරයෙන් නිරාකරණය කර රටේ දරු පරපුරේ අනාගත, අධ්‍යාපන අයිතිය සුරැකීමේ පියවරට වහා අවතීර්ණය වන මෙන් පොදු දේපල හා මානව හිමිකම් සුරැකීමේ මධ්‍යස්ථානය ආණ්ඩුවට බලකර සිටි.
පොදු දේපළ හා මානව හිමිකම් සුරුකීමේ මධ්‍යස්ථානය වෙනුවෙන් ලංකා බැංකු සේවක සංගමය, ලංකා වෙළඳ කාර්මික හා පොදු කම්කරු සංගමය, ලංකා වතු සේවා සංගමය, මාධ්‍ය සේවක වෘත්තීය සමිති සම්මේලනය, එක්සත් කම්කරු සම්මේලනය, තැපැල් හා විදුලි සංදේශ නිලධාරීන්ගේ සංගමය, ශ්‍රී ලංකා වෘත්තීය ජනමාධ්‍ය වේදීන්ගේ සංගමය, එක්සත් පොදු සේවා සංගමය, වාණිජ හා කාර්මික සේවක සංගමය, රක්‍ෂණ සේවක සංගමය, තොරතුරු හා විදුලි සංදේශ සියලු සේවක සංගමය, ලංකා ගුරු සංගමය, දුම්රිය ශ්‍රේණිගත වෘත්තීය සමිති එකමුතුව, ටෙලිකොම් ඉංජිනේරුමය ඩිප්ලෝමාධාරීන්ගේ සංගමය, ආහාර, බීම සහ දුම්කොළ කර්මාන්ත සේවක සමිතිය, ස්වාධීන තටාක සේවක සංගමය, ජාතික නිදහස් වෘත්තීය සමිතිය, රජයේ මුද්‍රණ ශිල්පීන්ගේ සංගමය, ලංකා වැවිලි සේවා සංගමය, ඉඩම් හා කෘෂිකාර්ම ප්‍රතිසංස්කරණ ව්‍යාපාරය, ප්‍රොටෙක්ට් සංගමය එම නිවේදනයට අත්සන් තබා
