2025 මාර්තු 27 වන දින, අන්තර් විශ්වවිද්‍යාල ශිෂ්‍ය බල මණ්ඩලය සහ සම සෞඛ්‍ය උපාධිධාරීන් විසින් ශ්‍රී ලංකා සෞඛ්‍ය අමාත්‍යාංශ ඉදිරිපිට පැවැත්වූ සාමකාමී සත්‍යග්‍රහය පොලිස් බලය සහ අධිකරණ බලය යොදවා විසුරුවා හැරීම සහ 27 දෙනෙකු අත්අඩංගුවට ගැනීම පිළිබඳව ලංකා බැංකු සේවක සංගමය දැඩි විරෝධය දක්වන බව මාධ්‍ය නිවේදනයක් නිකුත් කරමින් අවධාරණය කර සිටී.
එම නිවේදනයේ වැඩිදුරටත් සඳහන් වන්නේ, වසර ගණනාවක් රජයන් කීපයක් සමඟ විසඳා ගැනීමට නොහැකි වූ සම සෞඛ්‍ය උපාධාරීන්ගේ ගැටළුව, පෙර සේම පොලිස් බලය සහ අධිකරණ බලය යොදා ගනිමින් විසඳුම් සෙවීම ජනතාවාදී රජයක් ගන්නා සුදුසු උපාය මාර්ගයක් නොවන අතර, එය වැරදි ක්‍රියාමාර්ගයකි. අතීතයේ අන්තර් විශ්ව විද්‍යාල ශිෂ්‍ය බල මණ්ඩලයේ කැඳවුම්කරුවන් ලෙස කටයුතු කළ සහ දැනට අමාත්‍යධූර දරන ජාතික ජන බලවේග රජය, ශ්‍රී ලංකාවේ ශිෂ්‍ය ව්‍යාපාරය හා වෘත්තිය සමිති ව්‍යාපාරය සමග සහයෝගයෙන් සහ සාකච්ඡාවෙන් මෙම ගැටළුවලට සාධාරණ විසඳුමක් ලබාදිය යුතු මෙන්ම මෙවන් අර්බුදයන් සඳහා ප්‍රජාතන්ත්‍රවාදී ප්‍රවේශයන් ද ලබාගත යුතුය.
රට තුළ සියලු බලවේගයන්ගේ ආශිර්වාදය ලත් රජයක් ලෙස, ඉතා කෙටි කාලයක් තුළ ශ්‍රී ලාංකික ශිෂ්‍ය ව්‍යාපාරය සමග ගැටුමකට යාම අනාගත ජනතා අපේක්‍ෂා ජයග්‍රහණ සඳහා හොඳ පූර්වාදර්ශයක් නොවන බවද අප අවධාරණය කරමු. ජනතාවගේ ප්‍රජාතන්ත්‍රවාදී අයිතිවාසිකම් ආරක්ෂා කිරීම, සාමකාමී විරෝධතා පිළිගැනීම සහ වෘත්තීය සමිති හා ශිෂ්‍ය ව්‍යාපාර සමග සංවාදයක නිරත වීම ජනතාවාදී රජයකට නියමිත ක්‍රියාවන්ය. එබැවින්, ලංකා බැංකු සේවක සංගමය ලෙස අප, මෙවන් මර්දනයන්ට දැඩි විරෝධය පළ කරන අතර, අත්අඩංගුවට ගත් සියලුම පුද්ගලයින් වහාම නිදහස් කරන ලෙස බලකර සිටිමු.
