ශ්රී ලංකාවේ විශාලතම මූල්ය ආයතනය වන සේවක අර්ථසාධක අරමුදලේ (EPF) විනිවිදභාවය සහ තොරතුරු අනාවරණය කිරීමේ ක්රියාවලිය,
කොළඹ කොටස් වෙළෙඳපොළේ ලැයිස්තුගත සමාගම් සහ වාණිජ බැංකුවලට වඩා ඉතා අඩු මට්ටමක පවතින බව වේරිටේ රිසර්ච් ආයතනය පවසයි.
වේරිටේ රිසර්ච් ආයතනය විසින් අද (24) දින ප්රකාශයට පත් කරන ලද ‘ශ්රී ලංකාවේ සේවක අර්ථසාධක අරමුදල: තොරතුරු අනාවරණය කිරීමේ ප්රමාණවත්භාවය පිළිබඳ සංසන්දනාත්මක තක්සේරුවක්’ (The Employment Provident Fund in Sri Lanka: A Comparative Assessment of the Adequacy of Information Disclosure) නම් නව පර්යේෂණ වාර්තාව මඟින් මේ බව අනාවරණය කර ඇත.
පොදු ජනතාවගේ ඉතුරුම් පාලනය කරන අනෙකුත් ආයතනවලට සාපේක්ෂව, EPF ආයතනය ඉතා අඩු තොරතුරු ප්රමාණයක්, අවම විස්තර සහිතව, දීර්ඝ කාලීන ප්රමාදයන් සහිතව අනාවරණය කරන බව මෙම වාර්තාවෙන් සොයාගෙන ඇත. මෙයින් ඇඟවෙන්නේ එහි කළමනාකරු වන ශ්රී ලංකා මහ බැංකුව (CBSL), තමන් විසින් නියාමනය කරනු ලබන අනෙකුත් මූල්ය ආයතනවලට බලපාන විනිවිදභාවයේ ප්රමිතීන්ට වඩා අඩු ප්රමිතියක් EPF සඳහා අනුගමනය කරන බවයි.
එසේම, OECD හි විශ්රාම වැටුප් අධීක්ෂකවරුන්ගේ ජාත්යන්තර සංවිධානයේ (IOPS) මූලධර්ම සහ ‘ගෝලීය විශ්රාම වැටුප් විනිවිදභාවයේ නිර්ණායක’ (GPTB) වැනි ජාත්යන්තර මිණුම්දඬු සපුරාලීමට ද EPF අසමත් වී ඇත.
සාමාජිකයන් මුහුණ දෙන අවදානම
පුද්ගලික අංශයේ සේවකයන් නීතියෙන්ම EPF සඳහා දායක විය යුතු වුවද, එහි කළමනාකරණය සම්බන්ධයෙන් ඔවුන්ට කිසිදු බලයක් නොමැති අතර, තමන්ගේ ඉතුරුම් කැමති පරිදි ආපසු ලබා ගැනීමට ද නොහැකිය. එබැවින් ගෝලීය විනිවිදභාවයේ ප්රමිතීන් ආරක්ෂා නොවීම ඔවුන්ගේ අනාගත සුභසාධනය දැඩි අවදානමක හෙළීමකි.
විශේෂයෙන්ම 2019 වසරේ සිදුකළ වෝහාරික විගණන (forensic audits) මඟින් EPF අතීතයේදී මූල්ය වංචාවලට ගොදුරු වී තිබූ බව හෙළිදරව් වීම හේතුවෙන් මෙම තත්ත්වය තවත් බරපතල වේ.
යෝජිත ප්රතිසංස්කරණ
මෙම අසාර්ථකත්වයන් මඟහරවා ගැනීම සඳහා වේරිටේ රිසර්ච් ආයතනය ප්රධාන කෙටි හා මධ්යකාලීන ප්රතිසංස්කරණ තුනක් යෝජනා කරයි:
පළමුවැන්න:
සේවක අර්ථසාධක අරමුදල් පනතට පූර්ණ ලෙස අනුකූල වීම සහතික කිරීම.
දෙවැන්න:
ජාත්යන්තර හොඳම භාවිතයන් (International Best Practices) වහාම අනුගමනය කිරීම.
තෙවැන්න:
EPF තොරතුරු අනාවරණය කිරීම පිළිබඳ 2024 පුද්ගලික මන්ත්රී පනත් කෙටුම්පත කඩිනමින් සම්මත කිරීම.
සාමාජිකයන්ගේ අයිතිවාසිකම් සහ අරමුදලේ අඛණ්ඩතාව ආරක්ෂා කිරීම සඳහා, දිගුකාලීනව වඩාත් ශක්තිමත් නියාමන රාමුවක් සැකසීම අත්යවශ්ය බව ද එම වාර්තාව අවධාරණය කරයි.
වේරිටේ රිසර්ච් ආයතනයේ සම්පූර්ණ පර්යේෂණ වාර්තාව වෙත මෙතැනින් පිවිසිය හැකිය:
(The Leader)
