සංක්‍රමණිකයින් වෙනුවෙන් පැවති ප්‍රතිපත්තිය වෙනස්වී නෑ- ඕස්ට්‍රේලියානු බලධාරීන් කියයි
ශ්‍රී ලංකාව මුහුණ දී සිටින ආර්ථික අර්බුදය විසඳා ගැනීමට ජාත්‍යන්තර මූල්‍ය අරමුදලේ රාමුව තුළ සිට සහාය දෙන බව ඕස්ට්‍රේලියානු ස්වදේශ කටයුතු අමාත්‍ය ක්ලෙයාර් ඕ’නෙයිල් (Clare O’ Neil) මහත්මිය පවසයි.
නිල සංචාරයක් සඳහා මෙරටට පැමිණ සිටින ක්ලෙයාර් ඕ’නෙයිල් මහත්මිය අද (20) පෙරවරුවේ කොළඹ, කොටුව ජනාධිපති මන්දිරයේ දී ජනාධිපති ගෝඨාභය රාජපක්ෂ හමු වූ අවස්ථාවේ දී මේ බව ප්‍රකාශ කර ඇත.
නීතිවිරෝධි සංක්‍රමණ සහ මිනිස් ජාවාරම් සඳහා “ශූන්‍ය අවකාශය” ඕස්ට්‍රේලියාවේ පෙර පැවති කොන්සර්වේටිව් රජයේ ප්‍රතිපත්තිය වු අතර කම්කරු පක්ෂය නියෝජනය කරන නව රජයේ ප්‍රතිපත්තිය ද, එයම බව ක්ලෙයාර් මහත්මිය ප්‍රකාශ කර තිබේ.
නීති විරෝධි සංක්‍රමණ වැළැක්වීමට තමා ආරක්ෂක ලේකම්වරයාව සිටියදී ගත් ක්‍රියාමාර්ග පැහැදිලි කළ ජනාධිපතිවරයා නාවික හමුදාව එම පියවරයන් ඉදිරියට ගෙන යමින් ඇති බව මෙහිදී අවධාරණය කර ඇත.
ඕස්ට්‍රේලියානු රජය විසින් නෞකා, තාක්ෂණික සහ ද්‍රව්‍යමය ආධාර සපයමින් ඊට දෙන සහාය අගය කළ ඔහු දෙරට මනා සබඳතාවයකින් කටයුතු කරමින් සිටින බවද සඳහන් කර ඇත.
ඉන්දියන් සාගරයේ ආරක්ෂාව සම්බන්ධයෙන් ඕස්ට්‍රේලියාව දැඩි අවධානයෙන් පසු වන බවත්, එම අවශ්‍යතාව සපුරාලමින් ඉන්දියන් සාගරය ආරක්ෂක කලාපයක් ලෙස පවත්වා ගෙන යාමට තම රජයේ පූර්ණ සහාය ලබාදෙන බවත් ජනාධිපතිවරයා පෙන්වාදී තිබේ.
නාවික හමුදාවේ 50දෙනෙකු මේ වන විට විශේෂ පුහුණුවක් සඳහා ඕස්ට්‍රේලියාවට ගොස් සිටින අතර එවැනි පුහුණු අවස්ථා සහ මෙරට ආරක්ෂක හමුදා සමග සහයෝගයෙන් කටයුතු කිරීම පිළිබඳ ජනාධිපති ගෝඨාභය රාජපක්ෂ සිය ප්‍රශංසාව පළ කර ඇත.
රේගු පරිපාලනය සම්බන්ධයෙන් ඇති අත්දැකීම් ලබාදෙමින් රාජ්‍ය ආදායම ඉහළ නංවා ගැනීමටත්, පුනර්ජනනීය බලශක්ති උත්පාදන වැඩසටහන සාර්ථක කරගැනීමටත් සහාය වන බව ඔ්ස්ට්‍රේලියානු අමාත්‍යවරිය මෙහිදී සඳහන් කර තිබේ.
ධීවරයන් නියාමනය, වෘත්තීය හා කාර්මික අධ්‍යාපනය ඉහළ නැංවීම සහ ශ්‍රී ලංකාව ජාත්‍යන්තර සිසුන්ට උසස් අධ්‍යාපනය ලබාගත හැකි කේන්ද්‍රස්ථානයක් බවට පත් කිරීමට සහාය වීමට තම රජය සූදානම් බව ද ඇය ප්‍රකාශ කර ඇත.
ඕස්ට්‍රේලියානු දේශ සීමා බලකායේ සහ ස්වදේශ කටයුතු දෙපාර්තමේන්තුවේ APM කොමසාරිස් මයිකල් අවුට්‍රම් (Michael Outram), ඒකාබද්ධ නියෝජිතායතන කාර්ය සාධක බලකායේ අණදෙන නිලධාරී ජස්ටින් ජෝන්ස් (Justin Jones), ශ්‍රී ලංකාවේ ඕස්ට්‍රේලියානු මහ කොමසාරිස් ඩේවිඩ් හොලි (David Holly), පළමු ලේකම් ඇෂ්ලි ඇල්ඩර්ටන් (Ashley Alderton), විදේශ අමාත්‍ය මහාචාර්ය ජී.එල්. පීරිස්, ජනාධිපති ලේකම් ගාමිණී සෙනරත්, ජනාධිපති ප්‍රධාන උපදේශක ලලිත් වීරතුංග, ආරක්ෂක ලේකම් ජනරාල් කමල් ගුණරත්න, විදේශ ලේකම් අරුණි විජේවර්ධන, ආරක්ෂක මාණ්ඩලික ප්‍රධානි ජනරාල් ශවේන්ද්‍ර සිල්වා, නාවික හමුදාපති වයිස් අද්මිරාල් නිශාන්ත උළුගේතැන්න යන අයද, මෙම අවස්ථාවට එක්ව සිටියහ.
