කොළොන්නාව තෙල් තොග ගබඩා පර්යන්තයේ සේවකයින් 12කට කොවිඩ් 19 වෛරසය ආසාදනය වී ඇති බවට තහවුරු වී තිබේ.
රෝගී වූ කොළොන්නාව තෙල් තොග ගබඩා පර්යන්තයේ සේවකයෙකුට සිදුකළ පී.සී.ආර් පරීක්ෂණයෙන් ඔහු ආසාදිතයෙකු බවට හඳුනාගැනීමෙන් අනතුරුව එහි තවත් සේවකයින් පිරිසකට පී.සී.ආර් පරීක්ෂණ සිදුකර තිබේ.
ඒ අනුව ඊයේ (19) සහ අද (20) යන දිනවලදී ද එහි සේවකයින් පීසීආර් පරීක්ෂණය සඳහා යොමු කළ බව සෞඛ්‍ය අංශ සඳහන් කරයි.
මේ අතර අදාළ සිද්ධිය සම්බන්ධයෙන් අද විපක්ෂ නායක කාර්යාලයේ පැවති මාධ්‍ය හමුවකදී බලශක්ති වෘත්තිය සමිති නායක ආනන්ද පාලිත මහතා මෙසේ අදහස් පළ කළේය.
“පසුගිය සඳුදා කොළොන්නාවේ සේවක මහත්මයෙක් ශල්‍යකර්මයක් සඳහා රෝහල්ගත කරනවා. එහිදී පීසිආර් පරීක්ෂණයක් සිදුකරාම ඔහු පොසිටිව් වෙනවා. ඒ වාර්තාව අනුව කොළොන්නාවෙන් වහාම ඔහුට ගෙදර යන්න කියනවා. සඳුදා ගෙදර ගිය කොවිඩ් රෝගියා ගියේ වත්තල හුණුපිටියේ නිවස. ඒ ගෙදර දරුවෝ දෙන්නෙක් ඉන්නවා තරුණ, බිරිඳ ඉන්නවා. බ්‍රහස්පතින්දා හවස තමයි ඔහුව ගෙනියන්නේ ඊට පස්සේ තමයි කොළොන්නාවේ ඊයේ තමයි පරීක්ෂණ පටන් ගන්න යන්නේ. ඒ වෙනකොට ප්‍රවාහන අංශයේ කාන්තාවකට කොවිඩ්. 14කට ඊයේ වෙද්දි කොළොන්නාවේ කොවිඩ්. හරියට පරීක්ෂණ කරලා නෙමෙයි.“
කොළොන්නාව තෙල් ගබඩා පර්යන්තයේ සිදුකරන පී.සී.ආර් පරීක්ෂණ සම්බන්ධයෙන් නිවැරදි දත්ත ලබාදෙන ලෙස ප්‍රදේශය භාර මහජන සෞඛ්‍ය පරීක්ෂකවරුන් සෞඛ්‍ය බලධාරීන්ගෙන් ඉල්ලීමක් කර ඇති බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා සඳහන් කළේය.
