මාරාන්තික වෛරසයට ගොදුරු වූ බව ට්විටර් පණිවුඩයක් ඔස්සේ ප්‍රකාශ කිරීමෙන් දිනකට පසු කොවිඩ් 19ට බිලිවී ප්‍රගාෂ් ඥානප්‍රගාසම් අවසන් ගමන් ගියේය.
ශ්‍රී ලංකාවේ හමුදා නායකත්වය යටතේ දෝෂ සහගත ලෙස කළමනාකරණය කෙරුනු එන්නත් කිරීමේ යාන්ත්‍රණයට ගොදුරු වූ මෙම දීප්තිමත් තරුණ දෙමළ මාධ්‍යවේදියාට බ්‍රහස්පතින්දා (02) ජීවිතය අහිමි විය.
යාපනයේ පදිංචි 26 හැවිරිදි මාධ්‍යවේදියාගේ හදිසි අභාවය බ්‍රහස්පතින්දා සවස දැන ගත් පසු ලොව පුරා වෙසෙන දස දහස් සංඛ්‍යාත දෙමළ ජනතාව කම්පාවට පත්ව ශෝකය ප්‍රකාශ කිරීමට පටන් ගත්හ.
කිලිනොච්චි මාධ්‍ය සංසදය ඔහු ගුණ සමරා පුෂ්ප දීප උපහාරයක් පවත්වා තිබේ.
කොඩිකාමම් නිවසට වී ඔහු කළ සමාජ මාධ්‍ය ක්‍රියාකාරකම් කොයි තරම් නම් ජවසම්පන්න වූයේද යන්න ශ්‍රී ලංකාවේ උතුරු නැගෙනහිර දෙමළ මාධ්‍ය වලට අමතරව ඕස්ට්‍රේලියාව, බ්‍රිතාන්‍යය සහ කැනඩාව යන මාධ්‍යයන්හිද මරණය පිළිබඳ පුවත පල වීමෙන් විදහා දැක්විනි.
ප්‍රගාස් ඥානප්‍රගාසම් තමන් පෙලන ශාරීරික අසනීප‍ය - මාංශ පේශි දුස්තර්පණය (muscular dystrophy) - නම් ව්‍යාධිය නිසා කිසි විටෙකත් කිසිවකුගෙනුත් අනුකම්පාව පතා නොසිටි අතර ඔහු එය ඉතා උද්‍යෝගයෙන් හා ධෛර්යයෙන් යුතුව එම බාධකය ජය ගත්තේය.
රජය පවසන්නේ ඔවුන් මාධ්‍යවේදීන්ට එන්නත් සඳහා ප්‍රමුඛතාවක් ලබාදෙන බවයි. නමුත් මෙම තරුණ මාධ්‍යවේදියාට එම වරම ලැබුණේ නැත.
ඔහුගේ අභාවයට දිනකට පෙර ඔහු ට්විටර් පණිවුඩයක් නිකුත් කරමින් "දින පහක උණ රෝගයෙන් පසු අද මට කොවිඩ් -19 පොසිටිව් බව තහවුරු වුණා. සාමාන්‍ය සෞඛ්‍ය තත්වය යහපත්. මම පේශි දුස්තර්පණය සහිත රෝගියෙක්. නමුත් මේ දක්වා මට එන්නත ලබා දුන්නේ නැහැ. ”
එන්නත ලබා නොගත්තේදැයි විමසූ අයකුට පිළිතුරු දෙමින් එදිනම ඔහු තවත් ට්වීටර් පණිවිඩයක් නිකුත් කර තිබුනේ මෙලෙසිනි: “ඔව්, නමුත් ඔවුන් මාව මාංශ පේශි දුර්වල වීමේ රෝගියකු ලෙස පරීක්ෂා කළා, මගේ පියා සෞඛ්‍ය වෛද්‍ය නිලධාරී කාර්යාලයෙන් ඇහුවා. ඔවුන් මගේ වෛද්‍ය වාර්තා පරීක්ෂා කළ අතර එන්නත ලබා දිය නොහැකි බව පැවසුවා. ස්තුතියි.''
ශ්‍රී ලංකා වෛද්‍ය සභාවේ හිටපු සභාපති මහාචාර්ය හරේන්ද්‍ර ද සිල්වා සහ විශේෂඥ වෛද්‍ය සංගමයේ සභාපති දොස්තර ලක්කුමාර් ප්‍රනාන්දු උපුටා දක්වමින් කොළඹ පදනම් කරගත් ජ්‍යෙෂ්ඨ මාධ්‍යවේදී සුලෝචනා රාමයියා මෝහන් ට්විටර් පණිවිඩයකින් දක්වා තිබුනේ මාංශ පේශි දුර්වල පුද්ගලයකුට මෙම එන්නත ලබා ගත හැකි බවයි.
"මම වෛද්‍ය ලක්කුමාර් ප්‍රනාන්දුගෙන් විමසා බැලූ අතර ඔහු පැවසුවේ මාංශ පේශි දුර්වලතාවයෙන් පෙළෙන පුද්ගලයකුට එන්නත ලබා ගත හැකි බවයි."
සමාජ මාධ්‍ය ජාල ඔස්සේ හුවමාරු වූ මෙම තොරතුරු මඟින් පැහැදිලිව පෙන්නුම් කරන්නේ යුද හමුදා අධීක්ෂණය යටතේ ඉන්නා වෛද්‍ය බලධාරීන් විසින් මාධ්‍යවේදියාට එන්නත ලබා දීම ප්‍රතික්ෂේප කළ බවයි.
| සිංහල පුවරු මැද දෙමළ බසින් සටන් පුවරුවක් ඔසවා සිටින ප්‍රගාස් (සේයා -srilankabrief.org)
තමන්ගේ ගේ දිගු කාලීන සෞඛ්‍ය ගැටලු ගැන හොඳින් දැන සිටි ප්‍රගාෂ් එය පසෙකට දැමීමට තරම් නිර්භීත වූ අතර යුද්ධයෙන් පීඩාවට පත් වූ උතුරු නැගෙනහිර ජනතාවගේ අයිතිවාසිකම් සහ සුභසාධනය සඳහා සිය පුවත්පත් කලාවේ දායකත්වය අඛණ්ඩව ලබා දුන්නේය.
හේ කෙතරම් ධෛර්ය සම්පන්න හා ඉදිරි දැක්මක් ඇති අයෙක්ද යත්, සදහටම පෑන අත් හල දවසක යාපනය විශ්ව විද්‍යාලයේ වෛද්‍ය පර්යේෂණ සඳහා තම ශරීරය පරිත්‍යාග කිරීමට මෑතකදී තීරණය කර තිබුණි.
ඔහුට නිතරම අවශ්‍ය වූයේ තමන්ම වෙනස්කමක අංගයක් බවට පත් වීමටය. යම් යම් ක්‍රියා පටිපාටි අනුගමනය කර විවිධාකාර පෝරම පුරවා දිය යුතු යැයි කියමින් යාපනය විශ්ව විද්‍යාලය ඔහුට ආපසු ලිවීය.
ධෛර්ය සම්පන්න මාධ්‍යවේදියෙකුගේ අන්තිම පැතුම සාක්‍ෂාත් කර ගැනීමට නොහැකි වීම සැබවින්ම ශෝක ජනකය.
(ද ලීඩර්)
