රාජපක්‍ෂ හවුල් ආණ්ඩුව විසින් වැඩකරන ජනතාව දුෂ්කරතාවට පත් කරමින් අත්‍යාවශ්‍ය භාණ්ඩ මිල ඉහළ දැමීමට එරෙහිව වවුනියාවේදී උද්ඝෝෂණයක් පවත්වා තිබේ.
''මහින්ද සහ ගෝඨාගේ ආන්ඩුව බලයට පත්වී දෙවසරකට පස්සේ වැඩකරන ජනතාව පාරට ඇද දමලා.බඩේ පහර එල්ල කරලා. මේ තත්ත්වය දිගටම පැවතුණොත් ඉදිරියේදී රටේ සාගතයක් ඇතිවීම වළක්වන්න කාටවත් බැහැ.
''රට මංකොල්ල කාපු, මහජන මුදල් හොරා කාපු හැමෝම බලයෙන් ඉඳන් සැප ජීවිතයක් ගත කරනවා. ඒත් සාමාන්‍ය ජනතාව කළේ මේ අයට ඡන්දය දුන් අපරාධය මිස වෙන කිසිවක් නොවේ,'' යැයි උද්ඝෝෂණය කැඳවා තිබු නව ප්‍රජාතන්ත්‍රවාදී මාක්ස්- ලෙනින්වාදී පක්ෂයේ ලේකම් සී.කේ සෙන්තිල්වේල් පැවසීය.
වවුනියාව පැරණි බස් නැවතුම්පොළ ඉදිරිපිට ඉකුත් සති අන්තයේ පැවති මෙම විරෝධතාවයේ දී,
''වැඩකරන ජනතාව බඩගින්නේ තියන්න එපා'',
''පාලන මිලක් ගෙනෙනු'',
''වැඩකරන ජනතාවට හිරිහැර නොකරනු'',
''මැතිවරණ පොරොන්දුව ඉටුකරනු'' ආදී සටන් පාඨ කියමින් උද්ඝෝෂකයෝ විරෝධතා දැක්වුහ.
''පසුගිය මැතිවරණ සමයේ ආණ්ඩුව දුන් පොරොන්දු ජනතාවගේ බඩගින්න නිවන්න සමත් වුණාද? හමුදා බලය යොදා ගෙන වැඩ කරමින් ඉන්න මේ රාජපක්‍ෂ ආණ්ඩුව ගෙදර යවන්න මහජනතාව එකතු වී සටන් කරන්න ඕනෑ,'' යැයි ද සෙන්දිවේල් මෙහිදී ඉල්ලා සිටියේය.
නව ප්‍රජාතන්ත්‍රවාදී මාක්ස් ලෙනින්වාදී පක්ෂයේ, නායක සෙල්වම් කදිරගමනාදන්, වවුනියා දිස්ත්‍රික් සංවිධායක එන්.ප්‍රදීපන්, දෙමළ ජාතික පක්ෂයේ වවුනියාව දිස්ත්‍රික් සංවිධායක එන්.කරුණානිධි, වවුනියාව ශාඛාවේ පී.නේසරාජා ඇතුළු ලංකා ගුරු සංගමය, සහ සමාජ සාධාරණත්වය ඇතුළු වෘත්තීය සමිති,බහුජන සංවිධාන ද මෙම උද්ඝෝෂණයට එක්ව සිටියහ.
(the leader)
