වෘත්තීය සමිතියක් පිහිටුවීම නිසා රැකියාවෙන් දොට්ට දමන ලද සේවක පිරිසක් නැවත රාජකාරියේ පිහිටු වන ලෙස ආයතන බලධාරීන්ට බලකරමින් ගම්පහ දිස්ත්‍රික්කයේ ආයෝජන ප්‍රවර්ධන කලාපයක් ඉදිරිපිටදී විරෝධතාවයක් දියත් කර තිබේ.
2021 දෙසැම්බර් මස 1 වැනි බදාදා හවස වතුපිටිවල BOI පිවිසුම ඉදිරිපිට දී එක්සත් කම්කරු සම්මේලනයට අනුබද්ධ වෘත්තීය සමිතියක් වන වාණිජ හා කාර්මික සේවක සංගමය විසින් සංවිධානය කර තිබු උද්ඝෝෂණය සදහා ප්‍රදේශයට ඇද හැලුන අධික වැසි තත්වය පවා නොතකා දිවයිනේ ප්‍රමුඛතම වෘත්තීය සමිති රැසකගේ සහ සිවිල් සංවිධාන නියෝජිතයන්ගේ සහාය පල කර තිබුනි.
විරෝධතාව පැවැත්වුනේ ඇඟලුම් කර්මාන්තය, වතුකරය, සංචාරක කර්මාන්තය සහ ගෘහ සේවය ඇතුළු ක්ෂේත්‍ර සම්බන්ධයෙන් සොයා බැලීමට සමකාලීන වහල් භාවය පිළිබඳ එක්සත් ජාතීන්ගේ විශේෂ නියෝජිත ටොමෝයා ඔබොකටා මේ දිනවල ශ්‍රී ලංකාවේ නිල සංචාරයක යෙදී සිටියදීය.
වාණිජ හා කාර්මික සේවක සංගමය විසින් 2021 අගෝස්තු 20 වැනි දින වතුපිටිවල ATG ග්ලවුස් නිටිං ප්‍රයිවට් ලිමිටඩ් ආයතනයේ අළුතින් වෘත්තීය සමිති ශාඛාවක් පිහිටුවිමට කටයුතු කර තිබුනි.
එම ශාඛා සංගමය පිහිටුවීම පිළිබඳව වාණිජ හා කාර්මික සේවක සංගමය විසින් සමාගමට දැනුම් දුන් පසු සමාගම විසින් දින 4 ක කාලයක් තුළදී සංගමයේ සාමාජිකයන් 16 දෙනෙකු සේවයෙන් පහ කර ඇත.
ඒටීජී ග්ලවුස් නිටිං ප්‍රයිවට් ලිමිටඩ් සමාගම යනු ජාත්‍යන්තර වෙළෙඳපලට අත්වැසුම් අපනයනය කරන ප්‍රමුඛ පෙලේ සමාගමකි.
ATG ආයතනය විසින් වෘත්තීය සමිති කඩාකප්පල් කිරීම සහ සේවකයන් සේවයෙන් පහකිරීම ඇතුළු නීති විරෝධී ක්‍රියා දිගින් දිගටම සිදු කළද, සමාගම කිසිදු නීතිමය ප්‍රතිවිපාකයකට මුහුණ දී නොමැති බව වාණිජ හා කාර්මික සේවක සංගමය පවසයි.
එම සංගමය වැඩි දුරටත් පවසන්නේ මාරාන්තික වසංගත ව්‍යාප්තියක් රටේ පැවැති මොහොතක ATG ආයතනය විසින් සේවයෙන් ඉවත් කළ සේවකයන් සියළු දෙනාම පසුගිය මාස 3 ක කාලය තුළ රැකියාවක් නොමැතිව ජීවත් වීමට අරගල කරමින් සිටින බවයි.
වෘත්තීය සමිති විනාශ කිරීම සම්බන්ධයෙන් කුප්‍රකට ආයතනයක් ලෙස ATG ආයතනය හදුන්වා දෙන වෘත්තීය සමිති නායකයන් අවධාරණය කරන්නේ වෘත්තීය සමිති ක්‍රියාකාරකම්වලට සහාය වීම හේතුවෙන් ඔවුන්ගේ වෙනත් කර්මාන්ත ශාලාවක කම්කරුවන් 300 ක් පමණ සේවයෙන් ඉවත් කිරීමට 2018 වසරේදීත් ATG ආයතනය ක්‍රියා කර තිබු බවයි.
අසාධාරණ ලෙස සේවයෙන් ඉවත් කළ සේවකයන් 16 දෙනා නැවත සේවයේ පිහිටුවීමට මැදිහත් වන ලෙස ඉල්ලමින් ලංකා වෘත්තීය සමිති සම්මේලනයේ ප්‍රධාන ලේකම් ඩී ඩබ්ලිව් සුබසිංහ ගේ අත්සනින් යුතුව වෘත්තීය සමිති විසි දෙකක් 2021 සැප්තැම්බර් 21 දින කම්කරු අමාත්‍ය නිමල් සිරිපාල ද සිල්වා වෙත ලිපියක් යොමු කළත් ඉන් පලක් වු බවක් දැනගන්නට නැත.
වෘත්තීය සමිති නායකයන් අවධාරණය කරන්නේ ඉවත් කළ වෘත්තීය සමිති ක්‍රියාකාරිකයන් නැවත සේවයේ පිහිටවනතුරු, කලාපයේ අරගල දිගින් දිගටම දියත් කරන බවයි.
පළාත් බද වාර්තාකරුවන් පවසන පරිදි ATG ආයතනයේ ක්‍රියාකලාපයට එරෙහිව අවට ගම්වැසීන්ද වාණිජ හා කාර්මික සේවක සංගමය දියත් කරනු ලබන අරගලයට සහාය පළ කරති.
නිට්ටඹුව, වතුපිටිවල, රන්පොකුණගම, තිත්තවැල්මංක, මීවිටිගම්මන, මඩුවේගෙදර, හොරගොල්ල ආදී ගම්මාන රැසක ජනතාවත් උද්ඝෝෂණයට සහාය පළ කර තිබෙන අතර විරෝධතා බැනර් ප්‍රදර්ශනය කරමින් ATG ආයතනයට ඔවුන්ගේ විරෝධය දක්වා ඇත.
ආයෝජන ප්‍රවර්ධන කලාපයේ පාලකයන් වෘත්තීය සමිති අයිතිවාසිකාම් කඩ කිරීමට එරෙහිව, කම්කරු ඇමතිවරයාගේ කඩිනම් මැදිහත්වීම ලබා නොදෙන්නේනම් ජාත්‍යන්තර කම්කරු සංවිධානය දක්වා මෙම පැමිණිල ගෙන යන බව ඒකාබද්ධව විරෝධතාවයට සහාය දැක්වූ වෘත්තීය සමිති නායකයන් රජයට අනතුරු ඇගවු බව එක්සත් කම්කරු සම්මේලනයේ සභාපති ලීනස් ජයතිලක පවසයි.
වතුපිටිවල BOI පිවිසුම ඉදිරිපිට දී අද පැවැත්වු විරෝධතාවය සදහා පොදු දේපල හා මානව හිමිකම් සුරැකීමේ මධ්‍යස්ථානයට අනුබද්ධ වෘත්තීය සමිති, පුද්ගලික අංශයේ සේවක මධ්‍යස්ථානය, කටුනායක ATG ආයතනයේ ක්‍රියාත්මක වන අන්තර් සමාගම් සේවක සංගමයේ ක්‍රියාකාරීන්, කාන්තා සංවිධාන, මානව හිමිකම් ක්‍රියාකාරීන් සහ සිවිල් සමාජ ක්‍රියාධරයන් රැසක් සහභාගී වී සහයෝගය පල කර තිබේ.
සේයා - අමිල උඩගෙදර
