විදේශ ගමන් බලපත්‍ර ලබා ගැනීමට පවතින අධික ඉල්ලුම නිසා කලින් දිනයක් හා වේලාවන් වෙන්කර ගැනීමේ (Appointment) පහසුකම ඔක්තෝබර් මාසය දක්වා සම්පූර්ණ කර ඇති බැවින් මීළඟ දින ලබා දීමේ (Appointment) හැකියාව පවතින්නේ නොවැම්බර් මාසයේ බව ආගමන හා විගමන දෙපාර්තමේන්තුව පවසයි.
එම දෙපාර්තමේන්තුවේ විදේශ ගමන් බලපත්‍ර අංශයේ පාලක එච්.පී. චන්ද්‍රලාල් ප්‍රකාශ කළේ කලින් දිනයක් හා වේලාවන් වෙන්කර ගැනීමේ (Appointment) පහසුකම යටතේ දිනකට විදේශ ගමන් බලපත්‍ර දහසක් (1000) නිකුත් කෙරෙන බවයි.
පසුගියදා (18 වැනිදා) පමණක් එක් දින සහ සාමාන්‍ය සේවා යටතේ ඉල්ලුම්පත් 4700ක ප්‍රමාණයක් භාර ගැනීමට සිදුව ඇති අතර අසීමිත ලෙස විදේශ ගමන් බලපත්‍ර ලබා ගැනීමේ ප්‍රවණතාවය නිසා ආගමන හා විගමන දෙපාර්තමේන්තුව දැඩි අපහසුතාවකට පත්ව තිබේ.
එහෙත් එළැඹෙන නොවැම්බරයේ සිට මෙම තදබදය පහව යනු ඇතැයි තමා විශ්වාස කරන බව ආගමන හා විගමන දෙපාර්තමේන්තුවේ විදේශ ගමන් බලපත්‍ර අංශයේ පාලක එච්.පී. චන්ද්‍රලාල් සඳහන් කරයි.
