ජෛව බුබුළු යටතේ පැමිණෙන බව පවසමින් ගෙන්වන සංචාරකයන් නිසා හෝටල් ක්ෂේත්‍රයේ සේවකයන්ගේ ජීවිත අවදානමක පවතින බව හෝටල් සේවක මධ්‍යස්ථානයේ ජාතික සංවිධායක ජයතිලක රණසිංහ ප්‍රකාශ කළේ ය.
”ජෛව බුබුළු යටතේ කියලා සංචාරකයන් ගෙන්වූවාට ඒවා හරියට ක්‍රියාත්මක වෙන්නේ නෑ. ඒ වගේ ම සංචාරක ප්‍රවර්ධන අධිකාරිය දක්වලා තිබෙන සෞඛ්‍ය මාර්ගෝපදේශ හෝටල් විසින් අනුගමනය කෙරෙන්නෙත් නෑ. මේ නිසාම හෝටල් සේවකයන් බහුතරයකට පසුගිය කාලයේ කොවිඩ් වැළඳුනා. පසුගිය ඉන්දීය ක්‍රිකට් සංචාරයේදී එම ක්‍රිකට් කණ්ඩායම රැඳී සිටි ටාජ් සමුද්‍රා හෝටලයේ සේවකයන් ගණනාවකටම කොවිඩ් වැළඳුනා. එහි සේවකයන් 85-90ත් අතර ප්‍රමාණයකට කොවිඩ් වැළඳුනා. ඊට අමතරව බෙන්තර සෙන්ටාරා, අවානි වැනි හෝටල් වල වගේම නිරෝධායන මධ්‍යස්ථාන හැටියට භාවිත කරන හෝටල් රැසකත් සේවකයන්ට කොවිඩ් වැළඳිලා තිබෙනවා”
ජයතිලක මහතා පවසන්නේ ඇතැම් හෝටල් හිමිකාරීත්වයන් හෝටල් සේවකයන්ගේ සෞඛ්‍යාරක්ෂාව සම්බන්ධයෙන් සේවකයන් සමග යම් යම් එකඟතා වලට පැමිණිය ද ඇතැම් හෝටල් හිමිකරුවන් සිය බලය යොදාගනිමින් ඒ කිසිවක් සම්බන්ධයෙන් තැකීමක් නොකර සිටින බවයි.
”බෙන්තර සෙන්ටාරා හෝටලයේ සේවකයන්ගේ සෞඛ්‍යාරක්ෂාව සම්බන්ධයෙන් කිසිඳු එකඟතාවයකට පැමිණෙන්න එහි හිමිකාරීත්වය එකඟ වෙලා නෑ. එහි හිමිකාරීත්වය දරන්නේ ශ්‍රී ලංකන් එයාර් ලයින් ආයතනයේ සභාපති අශෝක් පතිරගේ. තමන්ගේ සෞඛ්‍යාරක්ෂාව සම්බන්ධයෙන් ප්‍රශ්න කරපු සේවකයන් 6කගේ සේවය එම හෝටලයේ පාලනාධිකාරිය විසින් නවත්වලා තිබෙනවා” යනුවෙන් ජයතිලක මහතා ඒ ගැන පැවසීය.
එමෙන්ම නැවත වතාවක් ඉන්දීය හා යුක්‍රේන සංචාරකයන් ගෙන්වීමේ සූදානමක් පවතින බැවින් හා මේ වන විට දකුණු අප්‍රිකානු ක්‍රිකට් කණ්ඩායම ශ්‍රී ලංකාවට පැමිණ ඇති බැවින් ඒ ඒ රටවල් වල ව්‍යාප්ත වෙමින් ඇති නව වෛරස ප්‍රබේද හෝටල් සේවකයන්ට ආසාදනය වීමේ වැඩි ඉඩකඩක් පවතින බව ද ඒ මහතා ප්‍රකාශ කළේ ය.
පසුගිය අගෝස්තු 28 වන දින මේ සම්බන්ධයෙන් ඉල්ලීම් සඳහන් කරමින් සෞඛ්‍ය ඇමති කෙහෙළිය රඹුක්වැල්ල මහතාට හෝටල් සේවක මධ්‍යස්ථානය ලිපියක්ද යොමු කර තිබුණි.
(අනිද්දා)
