කාන්තාවන්ගෙන් පහෙන් එකක් තම සමීප සහකරුවකු වෙතින් කායික සහ/හෝ ලිංගික ප්‍රචණ්ඩත්වයට මුහුණ දෙන ශ්‍රී ලංකාවේ, එම ප්‍රචණ්ඩත්වය වැළැක්වීම සදහා දින 16 ක විශේෂ වැඩසටහනක් එක්සත් ජාතීන්ගේ ජනගහන අරමුදල කොළඹ මහ නගර සභාව සමග එක්වී දියත් කර තිබේ.
කාන්තාවන්ට තම සමීප සහකරුවකුගෙන් සිදුවන ප්‍රචණ්ඩත්වය පිළිබඳව රටේ අවධානය යොමුකරවීම සහ, එබඳු අවස්ථාවන් වලදී සහය ඉල්ලා සිටීමට කාන්තාවන් දිරිගැන්වීම අරමුණු කරගනිමින් පසුගියදා කාන්තා උපකාරක දුරකථන අංකය සහ ‘මිතුරු පියස’ ක්ෂණික ඇමතුම් අංකය පිළිබඳ පණිවිඩ සමගින් කොළඹ මහනගර සභා ගොඩනැගිල්ල තැඹිලි පැහැ වර්ණයෙන් ආලෝකමත් කර ඇත.
එක්සත් ජාතීන්ගේ ජනගහන අරමුදල, කොළඹ මහ නගර සභාව සහ ශ්‍රී ලංකාවේ කැනඩා මහ කොමසාරිස් කාර්යාලය එක්ව මෙම වැඩසටහන ක්‍රියාවට නංවා තිබේ.
තම සමීප සහකරුවකුගෙන් සිදුවන ප්‍රචණ්ඩත්වය ඇතුළුව, ස්ත්‍රී පුරුෂ සමාජ භාවය පදනම් කරගත් සියලු ආකාරයේ ප්‍රචණ්ඩත්වයන් වැළැක්වීම සඳහා දින 16 ක විශේෂ වැඩසටහන ශ්‍රී ලංකාවේ කාන්තාවන් හා ගැහැනු ළමුන් සම්බන්ධ ප්‍රථම ජාතික සමීක්ෂණය වන කාන්තා සුව සමීක්ෂණය (WWS) ඔස්සේ ලැබුණු දත්ත පදනම් කරගනිමින් භාෂා තුනෙන්ම ක්‍රියාවට නංවන ලද ජාතික තලයේ ජනමාධ්‍ය ප්‍රචාරණ වැඩසටහනක අවසන් අදියර බව එක්සත් ජාතීන්ගේ ජනගහන අරමුදල පවසයි.
ශ්‍රී ලංකාවේ කාන්තාවන්ගෙන් පහෙන් එකක් (20.4%) තම සමීප සහකරුවකු වෙතින් කායික සහ/හෝ ලිංගික ප්‍රචණ්ඩත්වයට මුහුණ දී ඇති බව ඉහත සමීක්ෂණය මගින් පසුගියදා අනාවරණය වී තිබුනි.
එහෙත් සහකරුවකු වෙතින් ලිංගික ප්‍රචණ්ඩත්වයට මුහුණ දුන් කාන්තාවන්ගෙන් අඩක් පමණම (49.3%) ඒ සම්බන්ධයෙන් කිසිදු උපකාරක සේවයක සහය ලබාගෙන නොමැත.
එමෙන්ම සමීප සහකරුවකු වෙතින් කායික සහ/හෝ ලිංගික ප්‍රචණ්ඩත්වයට මුහුණ දුන් කාන්තාවන්ගෙන් තුනෙන් එකක් (35.7%) තුළ සියදිවි නසාගැනීමේ සිතිවිලි ඇති වූ බවද මෙම සමීක්ෂණය මගින් අනාවරණය වී තිබේ.
මෙම දත්ත, ප්‍රචණ්ඩත්වය හේතුවෙන් කාන්තාවන් සහ ගැහැනු ළමුන්ගේ ජීවිත වලට ඇතිවන බලපෑම පැහැදිලිව පෙන්වා දෙන බව එක්සත් ජාතීන්ගේ ජනගහන අරමුදල සදහන් කරයි.
මෙම තත්වයන් අවම කිරීමට නම්, ප්‍රචණ්ඩත්වයට මුහුණදෙන කාන්තාවන් ජාතික උපකාර සේවාවන් වල සහය ලබා ගැනීමට දිරිගැන්වීම සහ, ඔවුන්ට එම උපකාර ලබාදීම සඳහා අවශ්‍ය විධිමත් ක්‍රමවේදයන් ස්ථාපිත කිරීම අත්‍යවශ්‍ය බව එක්සත් ජාතීන්ගේ ජනගහන අරමුදලේ අදහසයි.
2030 තිරසාර සංවර්දන ඉලක්ක මාලාවට සමගාමීව, ස්ත්‍රී පුරුෂ සමාජ භාවය පදනම් කරගත් ප්‍රචණ්ඩත්වයෙන් හා කාන්තාවන්ට හානිකර වන්නා වූ අනෙකුත් ක්‍රියාකාරකම් වලින් තොර ලෝකයක් නිර්මාණය කිරීම සඳහා, ශ්‍රී ලංකාවේ විවිධ ජන කොට්ඨාශයන් වෙත ආමන්ත්‍රණය කිරීමට එක්සත් ජාතීන්ගේ ජනගහන අරමුදල කටයුතු කරනු ඇති බවට ඔවුන් වැඩි දුරටත් නිවේදනය කර ඇත.
(Leader)
