ලංකා විදුලි බල මණ්ඩලය පාඩු ලැබීම් ගණනය කරන තෙක් විදුලිය ගාස්තු වැඩිකිරීම් අත්හිටුවන ලෙස ඉල්ලා සිටිමින් නිදහස් වෙළඳ කලාප සහ පොදු සේවා සේවක සංගමය විසින් ජනාධිපතිවරයා වෙත ලිපියක් යොමු කරමින් ඉල්ලීමක් කර ඇත.
එම ලිපියේ වැඩිදුරටත් සඳහන් වන්නේ, විදුලිය ගාස්තු නැවත වැඩි කිරීම සඳහා යෝජනාව (ජනවාරි 02) දින පැවැත්වෙන ඇමති මණ්ඩල රැස්වීමට ඉදිරිපත් කරන බව විදුලිබල හා බලශක්ති ඇමති කංචන විජේසේකර ඇමතිවරයා ඉකුත් සතියේ මාධ්‍යයට කියා තිබුණි. ආර්ථික අර්බුදයට හසුව ඒ සඳහා සාධාරණ විසඳුම් නොමැතිව අතිශය අසීරු ජීවිත ගත කරන ජනතාවකට එය මාස 06 ක් ඇතුළත කෙරෙන දෙවන ගාස්තු වැඩි කිරීම වන බැවින් මෙම යෝජිත විදුලි බිල වැඩි කිරීම පිළිබඳව පහත දැක්වෙන කරුණු කෙරෙහි ඔබගේ අවධානය යොමු කරවීමට අප සංගමය තීරණය කළ බව දන්වා සිටිනු කැමැත්තෙමු.
මෙම යෝජිත වැඩිවීම සියයට 65 ක් පමණ වන්නේ යැයි ද, එසේ වැඩි කිරීමට නොහැක්කේ නම්, මේ වසරේ දෛනික විදුලිය කප්පාදුව පැය 08 ක් පමණවීම වැළකිය නොහැකි බව ද ඇමතිවරයා කියා තිබුණේ ජනතාවට කෙරෙන තර්ජනයක ස්වරයෙනි. ලංකා විදුලිබල මණ්ඩලය (ලංවිම) පාඩු ලබන්නේ ජනතාවගේ වරදින් යැයි කියන්නාක් මෙනි.
ඒ සමග ඇමතිවරයා විදුලිබල මණ්ඩලයේ වැටුප් ගෙවීමේ විස්තර ලෙස පසුගිය සැප්තැම්බර, ඔක්තෝම්බර හා නොවැම්බර මාසවල වැටුප් ලේඛනයක් ඔහුගේ “ට්විට” ගිණුමෙන් ප්‍රසිද්ධකර තිබුණි. එම විස්තර අනතුරුව ප්‍රධාන මාධ්‍ය මගින් ද වාර්තාකර තිබිණ. ලංවිම පාඩු පියවා ගැනීමට විදුලිය ගාස්තු වැඩි කිරීමේ ඔහුගේ යෝජනා පාරදෘශ්‍යභාවයක් ඇතිව කෙරෙන්නේ යැයි සාධාරණය කිරීමක් වශයෙන් එය ප්‍රසිද්ධ කෙරුවක් විය යුතුය. එය අසම්පූර්ණ මෙන්ම සවිස්තර වැටුප් ලේඛනයක් නොවන බැව්ද පළමු කියවීමෙන්ම දැකිය හැකිය. ලංවිම වැටුප් ගෙවීම් සතු පරස්පර, විෂමතා සහ ඒවායේ යටිපෙළ ඇති දූෂණ ඉන් වසන් කිරීමට නොහැකිව ඇත.
ඔබගේ පහසුව වෙනුවෙන් ඇමතිවරයා එසේ ප්‍රසිද්ධකර ඇති පසුගිය මාස 03 හි ලංවිම වැටුප් ලේඛනයේ පිටපතක් මේ සමග යොමු කරන අතර එහි ඇති ප්‍රශ්නගත කාරණා හා විෂමතා සැකෙවින් පහතින් සටහන් කරන්නෙමු.
- ඇමතිවරයා දෙසැම්බර 29 වන දින මාධ්‍යයට කියූ අයුරු මෙම 2023 වසරේදී ලංවිම සේවකයින් 1,100 ක් විශ්‍රාම යන නමුත් එම තනතුරු කිසිවක් සඳහා නැවත පත්වීම් නොකරන්නේය. එහි එකම තේරුම නම් 1,100 ක අනවශ්‍ය අතිරික්ත සේවක පිරිසකට ලංවිම මේ දක්වා වැටුප් හා දීමනා ගෙවා ඇති බවය.
- ඊට අමතරව, ලංවිම විසින් ලබා දිය යුතු සේවා පෞද්ගලික ආයතන වලට පවරා ඒ වෙනුවෙන් මුදල් ගෙවා ඇත. එහෙත් ඒ වියදම වැටුප් ලේඛනයේ නැත. එබැවින් පසුගිය 2021 හා 2022 වසරවල සිදුවූ ඒ නාස්තිය නැතිනම් දූෂණය කොපමණදැයි කිව යුතුව ඇත.
- ලංවිම සේවා පෞද්ගලික ආයතන වලට මුදලට ලබාදීමට හා අතිරික්ත සේවකයින් 1,100 ක් සඳහා පඩි නඩි සියල්ල ගෙවමින් පසුගිය තෙමසෙහි රුපියල් මිලියන 2001.4 ක දැවැන්ත අතිකාල ගෙවීමක්ද සිදුකර ඇත.
- එපමණක් නොව, අතිරික්ත සේවකයින් 1,100 ක්ද පෞද්ගලික ආයතන වලට සේවා පැවරීම්ද අතිකාල ගෙවීම්ද නොතකා එකී වැටුප් ලේඛනයට අනුව, “සාමාන්‍ය වැටුප් මට්ටමට අනුව යොදවා ගත් සෘජු ශ්‍රමිකයින්” (Direct Labour at normal rate) සඳහා රුපියල් මිලියන 1,751.61 ක් ගෙවා ඇත. ඔවුන් වෙනුවෙන් රුපියල් මිලියන 155.12 ක දීමනා ගිණුමක්ද ඇත.
- කාර්යක්ෂමතාව සඳහා සාමාන්‍ය පිළිගත් කලමනාකරණ රීතිය වන්නේ, ආයතනයක කලමනාකරණ සේවක (Management Staff) වැටුප් හා දීමනා වෙනුවෙන් වැය කරන ප්‍රතිශතය සේවක වැටුප් ප්‍රමාණයෙන් සියයට 20 ක් හෝ ඊට අඩු ප්‍රතිශතයක් ලෙස හැමවිට පවත්වා ගැනීමය. එහෙත් මෙම ලංවිම වැටුප් ලේඛනයට අනුව කලමනාකරණ සේවක වැටුප් හා දීමනා එකතුව සේවක වැටුපෙන් සියයට 52 ක් පමණ වන්නේය. ඉන් කියැවෙන්නේ අනවශ්‍ය සේවක පිරිසක් කලමනාකරණය වෙනුවෙන් නඩත්තු කරන බව හෝ සේවයේ ඉන්නා කලමනාකරණ සේවකයින් සඳහා මණඩලයට ඔරොත්තු දිය නොහැකි වැටුප් හා දීමනා ගෙවන බවය.
- මණ්ඩලයට ඔරොත්තු දිය නොහැකි මුදලක් කලමනාකරණ සේවකයින් සඳහා ගෙවීමේදී එකී වැටුප් ලේඛනයට අනුව, ඔවුන්ට ගෙවනු ලබන දීමනා ඔවුන්ගේ වැටුප මෙන් සියයට 50 ට වැඩි ප්‍රතිශතයකි. වැටුප් වැඩි කිරීම වෙනුවට මාසිකව අතට ගන්නා මුදල වැඩි කිරීමේ උපායික ගෙවීම් ලෙස අපි එය කියවා ගනිමු.
- පසුගිය තෙමසෙහි සියලු පාර්ශවයන් සඳහා ගෙවූ රුපියල් මිලියන 942.6 ක් වන දීමනා කවර කාරණා වෙනුවෙන් ගෙවූ දීමනා දැයි එකී ලේඛනයේ සඳහන් නොවන්නේය.
- ඒ සමග ව්‍යවස්ථාපිත ගෙවීම් වශයෙන් සඳහන් රුපියල් මිලියන 1,522 ක දැවැන්ත වියදම අනිවාර්ය නිශ්චිත වියදමක් විය යුතු නමුත් එය වැටුප් ලේඛනයෙහි සඳහන් වන්නේ කුමක් සඳහාදැයි නොකියවේ.
මේ තෙමසක විස්තරයක් පමණි. එබැවින් එවැනි කාරණා පිළිබඳ සාධාරණ ප්‍රසිද්ධ කරුණු පැහැදිලි කිරීමකින් තොරව, විදුලිය ගාස්තු වැඩි නොකරන්නේ නම් දෛනික විදුලි කාප්පාදුව පැය 08 ක් කිරීමට සිදුවන්නේ යැයි කීමට ඇමතිවරයාට කිසිදු සදාචාරමය අයිතියක් නැත.
එවගේම එම කරුණු පැහැදිලි කිරීමෙන් පාරිභෝගිකයින්ට සහ වෘත්තීය සමිති සඳහා ලංවිම පාඩු පියවීමේ විසඳුම් ඉදිරිපත් කිරීමේ අවස්ථාවක් ලැබෙන හෙයින් ඇමති මණ්ඩලයට ඉදිරිපත් කෙරෙන විදුලිය ගාස්තු වැඩි කිරීමේ යෝජනාව එතෙක් අනුමත නොකරන මෙන්ද, ඒ වෙනුවට ඉහත කාරණා පැහැදිලි කරන මෙන් ඇමතිවරයාට ඇමති මණ්ඩල තීන්දුවක් ලබා දෙන මෙන්ද අප සංගමය මෙයින් ඉල්ලා සිටිමු.
