අනුරාධපුර ශික්ෂණ රෝහලේ සිද්ධියේ වෛද්‍යවරියට අපහසුතාවයට පත්වන ආකාරයට හැසිරෙන්න එපා - සෞඛ්‍ය අමාත්‍යංශය
අනුරාධපුර ශික්ෂණ රෝහලේ වෛද්‍යවරියකට මුහුණපෑමට සිදු වු සිද්ධිය සම්බන්ධයෙන් මේ වන විටත් පොලිස් පරීක්ෂණ සිදුවන අතර සැකකරුවන් අත්අඩංගුවට ගැනීම සඳහා පොලිස් කණ්ඩායම් කීපයක් ම යොදවා ඇති බව සෞඛ්‍ය අමාත්‍යංශයට වාර්තා කර ඇත.
මෙම සිද්ධිය සම්බන්ධයෙන් කරුණූ සොයා බැලීම සඳහා සෞඛ්‍ය අමාත්‍යංශයේ වෛද්‍ය සේවා අධ්‍යක්ෂ ප්‍රමුඛ නිලධාරීන් කණ්ඩායමක් මේ වන විටත් අනුරාධපුර ශික්ෂණ රෝහල වෙත යවා ඇත.
සිද්ධිය පිළිබඳ ව කඩිනම් පරීක්ෂණයක් සිදු කර වැරදිකරුවන් නීතිය හමුවට ගෙන ඒමට හැකිවනු ඇතැයි අමාත්‍යංශය අපේක්ෂා කරන අතර, එතෙක් සන්සුන් ව කටයුතු කරන ලෙසත්, අදාළ පරීක්ෂණ සිදු කරන නිලධාරීන්ට අවශ්‍ය සහයෝගය ලබාදෙන ලෙසත්, සෞඛ්‍ය හා ජනමාධ්‍ය අමාත්‍යංශය සියලු පාර්ශවයන්ගෙන් ඉල්ලීමක් කරයි.
අදාළ සිද්ධිය වාර්තා කිරීමේ දී විශේෂයෙන් ම සිද්ධියට මුහුණ පෑ වෛද්‍යවරියගේ අනන්‍යතාවය හෙළිදරව් කරමින් එම වෛද්‍යවරියත් ඇගේ පවුලේ සමාජිකයනුත් අපහසුතාවයකට පත් වන අකාරයට කටයුතු නොකරන ලෙස ද සෞඛ්‍ය හා ජනමාධ්‍ය අමාත්‍යංශය සියලුම මාධ්‍යවේදීන්ගෙන් හා මාධ්‍ය ආයතන වෙතින් ඉල්ලීමක් කර සිටියි.
